ന്യൂദല്‍ഹി: 59 ചൈനീസ് ആപ്പുകള്‍ നിരോധിച്ചതിന് പിന്നാലെ വെയ്‌ബോ അക്കൗണ്ട് ഉപേക്ഷിച്ച് പ്രധാനമന്ത്രി നരേന്ദ്ര മോദി. ട്വിറ്ററിന് സമാനമായ ചൈനീസ് നിര്‍മ്മിത സോഷ്യല്‍മീഡിയാ പ്ലാറ്റ്‌ഫോമാണ് വെയ്‌ബോ.
ബുധനാഴ്ച മുതല്‍ മോദിയുടെ ഫോട്ടോകളും പോസ്റ്റുകളും വെയ്‌ബോയില്‍ നിന്നും നീക്കം ചെയ്തിരുന്നു. ഇതിന് പിന്നാലെയാണ് അക്കൗണ്ടും ഉപേക്ഷിച്ചത്. 115 പോസ്റ്റുകളാണ് മോദി വെയ്‌ബോയില്‍ ഇട്ടിരുന്നത്.
2015ലെ ചൈന സന്ദര്‍ശനത്തിന് മുന്നോടിയായിട്ടായിരുന്നു മോദി വെയ്‌ബോ ആപ്പില്‍ അക്കൗണ്ട് തുടങ്ങിയത്. 2.4 ലക്ഷം ഫോളോവേഴ്‌സാണ് മോദിക്ക് വെയ്‌ബോയിലുണ്ടായിരുന്നത്. ഇവരില്‍ ഭൂരിഭാഗവും ചൈനക്കാരായിരുന്നു.
2015 ജൂണ്‍ മുതല്‍ ഇതുവരെ ചൈനീസ് പ്രസിഡന്റ് ഷീ ജിങ്പിങിന് മോദി പിറന്നാള്‍ ആശംസകള്‍ നേര്‍ന്നിരുന്നതും വെയ്‌ബോയിലൂടെയായിരുന്നു. ഷീ ജിങ്പിങുമായുള്ള കൂടിക്കാഴ്ചയ്ക്ക് ശേഷം ഇന്ത്യാ-ചൈന ബന്ധത്തെക്കുറിച്ചും മോദി വെയ്‌ബോയില്‍ പോസ്റ്റ് ചെയ്തിരുന്നു.
ആപ്പ് അണ്‍സബ്‌സ്‌ക്രൈബ് ചെയ്യാന്‍ തങ്ങള്‍ തീരുമാനിക്കുകയായിരുന്നെന്ന് ഇന്ത്യന്‍ എംബസി അറിയിച്ചു.
ഗല്‍വാന്‍ മേഖലയിലെ സംഘര്‍ഷത്തെത്തുടര്‍ന്നായിരുന്നു കേന്ദ്രസര്‍ക്കാര്‍ ചൈനീസ് നിര്‍മ്മിത ആപ്പുകള്‍ നിരോധിച്ചത്. ടിക് ടോക്ക്, യു.സി ബ്രൗസര്‍ അടക്കം 59 ആപ്പുകളാണ് നിരോധിച്ചത്.
ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിനെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ