ഐ.പി.എല്‍ 2025ന് മുന്നോടിയായുള്ള താരലേലത്തിന് ആവേശപൂര്‍വമാണ് കൊടിയിറങ്ങിയത്. എല്ലാ ടീമുകളും ശക്തമായ സ്‌ക്വാഡുമായി കിരീടത്തിനായി പടയൊരുക്കം ആരംഭിച്ചിരിക്കുകയാണ്.
വെടിക്കെട്ട് വീരന്‍മാരും വിക്കറ്റ് വേട്ടക്കാരുമായി എല്ലാ ടീമുകളും സ്റ്റേബിളായ സ്‌ക്വാഡ് തന്നെയാണ് പടുത്തുയര്‍ത്തിയിരിക്കുന്നത്. ഐ.പി.എല്‍ ചരിത്രത്തിലെ എക്കാലത്തെയും മികച്ച വിക്കറ്റ് വേട്ടക്കാരനായ യൂസ്വേന്ദ്ര ചഹലിനെ പഞ്ചാബ് കിങ്‌സ് സ്വന്തമാക്കിയപ്പോള്‍ എക്കാലത്തെയും മികച്ച റണ്‍ വേട്ടക്കാരനായ വിരാട് കോഹ്‌ലി ഇത്തവണയും റോയല്‍ ചലഞ്ചേഴ്‌സിനൊപ്പം തുടര്‍ന്നു.
കിരീടം നിലനിര്‍ത്താനുറച്ചാണ് കൊല്‍ക്കത്ത നൈറ്റ് റൈഡേഴ്‌സ് ടീം പടുത്തുയര്‍ത്തിയിരിക്കുന്നത്. ക്രിക്കറ്റ് ലോകത്തിന്റെ എല്ലാ കോണില്‍ നിന്നുള്ള വെടിക്കെട്ട് വീരന്‍മാര്‍ നൈറ്റ് റൈഡേഴ്‌സ് സ്‌ക്വാഡിലുണ്ട്.
ടി-20 ഫോര്‍മാറ്റില്‍ മുന്നൂറിലധികം സിക്‌സര്‍ നേടിയ ഒന്നും രണ്ടുമല്ല അഞ്ച് താരങ്ങളാണ് കൊല്‍ക്കത്ത നൈറ്റ് റൈഡേഴ്‌സിന്റെ പടകുടീരത്തിലുള്ളത്.
പല ടീമുകളിലും ഒന്നും രണ്ടും താരങ്ങള്‍ മാത്രമുള്ളപ്പോഴാണ് കൊല്‍ക്കത്ത അഞ്ച് വെടിക്കെട്ട് വീരന്‍മാരെ ഈഡന്‍ ഗാര്‍ഡന്‍സിലെത്തിച്ചിരിക്കുന്നത്. ഇത് പരിഗണിക്കുമ്പോള്‍ ടി-20 ഫോര്‍മാറ്റിലെ ഏറ്റവും എക്‌സ്പീരിയന്‍സ്ഡായ ബാറ്റിങ് നിരയിലാണ് നിലവില്‍ കെ.കെ.ആറിനൊപ്പമുള്ളത് എന്ന് പറയേണ്ടി വരും.
താരലേലത്തിന് ശേഷം ഓരോ ടീമിലും 300+ ടി-20 സിക്‌സറുകള്‍ നേടിയ താരങ്ങളെ പരിശോധിക്കാം.
കൊല്‍ക്കത്ത നൈറ്റ് റൈഡേഴ്‌സ് (അഞ്ച് താരങ്ങള്‍)
ആന്ദ്രേ റസല്‍ – 721 സിക്‌സര്‍
ക്വിന്റണ്‍ ഡി കോക്ക് – 425 സിക്‌സര്‍
മോയിന്‍ അലി – 363 സിക്‌സര്‍
റഹ്‌മാനുള്ള ഗുര്‍ബാസ് – 315 സിക്‌സര്‍
റോവ്മന്‍ പവല്‍ – 303 സിക്‌സര്‍
റോയല്‍ ചലഞ്ചേഴ്‌സ് ബെംഗളൂരു (മൂന്ന് താരങ്ങള്‍)
വിരാട് കോഹ്‌ലി – 416 സിക്‌സര്‍
ലിയാം ലിവിങ്‌സ്റ്റണ്‍ – 404 സിക്‌സര്‍
ടിം ഡേവിഡ് – 300 സിക്‌സര്‍
ദല്‍ഹി ക്യാപ്പിറ്റല്‍സ് (രണ്ട് താരങ്ങള്‍)
ഫാഫ് ഡു പ്ലെസി – 403 സിക്‌സര്‍
കെ.എല്‍. രാഹുല്‍ – 311 സിക്‌സര്‍
ഗുജറാത്ത് ടൈറ്റന്‍സ് (രണ്ട് താരങ്ങള്‍)
ജോസ് ബട്‌ലര്‍ – 509 സിക്‌സര്‍
ഗ്ലെന്‍ ഫിലിപ്‌സ് – 341 സിക്‌സര്‍
ലഖ്‌നൗ സൂപ്പര്‍ ജയന്റ്‌സ് (രണ്ട് താരങ്ങള്‍)
നിക്കോളാസ് പൂരന്‍ – 581 സിക്‌സര്‍
ഡേവിഡ് മില്ലര്‍ – 486 സിക്‌സര്‍
മുംബൈ ഇന്ത്യന്‍സ് (രണ്ട് താരങ്ങള്‍)
രോഹിത് ശര്‍മ – 525 സിക്‌സര്‍
സൂര്യകുമാര്‍ യാദവ് – 334 സിക്‌സര്‍
ചെന്നൈ സൂപ്പര്‍ കിങ്‌സ് (ഒരു താരം)
എം.എസ്. ധോണി – 338 സിക്‌സര്‍
രാജസ്ഥാന്‍ റോയല്‍സ് (ഒരു താരം)
സഞ്ജു സാംസണ്‍ – 332 സിക്‌സര്‍
പഞ്ചാബ് കിങ്‌സ് (ഒരു താരം)
ഗ്ലെന്‍ മാക്‌സ്‌വെല്‍ – 502 സിക്‌സര്‍
അതേസമയം, സണ്‍റൈസേഴ്‌സ് ഹൈദരാബാദിനൊപ്പം 300 ടി-20 സിക്‌സറുകള്‍ പൂര്‍ത്തിയാക്കിയ ഒരു താരം പോലുമില്ല. വെടിക്കെട്ട് വീരന്‍ ഹെന്‌റിക് ക്ലാസന്റെ പേരില്‍ 270 സിക്‌സറുകളാണുള്ളത്. ടീമിലെ പുതിയ അഡീഷനായ ഇഷാന്‍ കിഷന്‍ ടി-20യില്‍ 223 സിക്‌സറടിച്ചപ്പോള്‍ ട്രാവിസ് ഹെഡും അഭിഷേക് ശര്‍മയും യഥാക്രമം 188 സിക്‌സറും 181 സിക്‌സറും സ്വന്തമാക്കിയിട്ടുണ്ട്.
Content highlight: Players with 300+ T20 sixes among IPL Squads