ന്യൂദല്‍ഹി: നാട്ടില്‍ വികസനം പാടില്ലെന്നാണ് പ്രതിപക്ഷത്തിന്റെ നിലപാടെന്ന് മുഖ്യമന്ത്രി പിണറായി വിജയന്‍. നാട്ടുകാരെ പ്രതിപക്ഷം സമരത്തിനിറക്കുകയാണ്. വൈകാരികമായ സമരമാണ് സില്‍വര്‍ലൈനിനെതിരെ ഇപ്പോള്‍ നടക്കുന്നത്. വികസന വിരുദ്ധ വിദ്രോഹ സഖ്യത്തെ അംഗീകരിക്കില്ല. ജനം കൃത്യമായി എല്ലാം മനസിലാക്കുന്നുണ്ടെന്നും പിണറായി പറഞ്ഞു.
ഏറ്റെടുക്കാത്ത ഭൂമിക്ക് എങ്ങനെ നഷ്ടപരിഹാരം നല്‍കുമെന്നും പിണറായി വിജയന്‍ ചോദിച്ചു. ഒരാളെയും ദ്രോഹിച്ച് പദ്ധതി നടപ്പാക്കില്ല. ആരും കിടപ്പാടം ഇല്ലാത്തവരായി മാറില്ല. ഒരു വികസനവും നാട്ടില്‍ നടക്കാന്‍ പാടില്ലെന്നാണ് പ്രതിപക്ഷ നിലപാടെന്നും മുഖ്യമന്ത്രി പറഞ്ഞു. ബഫര്‍ സോണിലെ ഭൂമിക്ക് നഷ്ടപരിഹാരമുണ്ടാവില്ലെന്നും അദ്ദേഹം കൂട്ടിച്ചേര്‍ത്തു.
ഭൂമിയും വീടും നഷ്ടപ്പെടുന്നവര്‍ക്ക് അതുറപ്പാക്കുമെന്നും മുഖ്യമന്ത്രി പറഞ്ഞു. ഒരാളേയും ദ്രോഹിച്ച് സില്‍വര്‍ലൈന്‍ പദ്ധതി നടപ്പാക്കില്ല. പദ്ധതിയെ തകര്‍ക്കാന്‍ കേരളത്തിലെ പ്രതിപക്ഷം ശ്രമിക്കുന്നുവെന്നും പിണറായി വിജയന്‍ പറഞ്ഞു
മുമ്പ് ഗെയ്ല്‍ പദ്ധതി ആരംഭിച്ചപ്പോഴും സമാനമായ രീതിയില്‍ സമരമുണ്ടായിരുന്നു. പിന്നീട് ജനങ്ങള്‍ പദ്ധതിയെ കുറിച്ച് മനസിലാക്കി സര്‍ക്കാറിനൊപ്പം നിന്നു. സില്‍വര്‍ലൈന്‍ സംബന്ധിച്ച് മാധ്യമങ്ങള്‍ തെറ്റായ പ്രചാരണം നടത്തരുതെന്നും പിണറായി പറഞ്ഞു.
കെ റെയിലിനെക്കുറിച്ചുള്ള കാര്യങ്ങള്‍ അതീവ താല്‍പര്യത്തോടെ പ്രധാനമന്ത്രി നരേന്ദ്ര മോദി കേട്ടുവെന്നും മുഖ്യമന്ത്രി പറഞ്ഞു. പദ്ധതിയോട് അനുഭാവപൂര്‍ണമായ നിലപാടാണ് പ്രധാനമന്ത്രി സ്വീകരിച്ചത്. പ്രധാനമന്ത്രിയുടെ പ്രതികരണങ്ങള്‍ ആരോഗ്യകരമായിരുന്നുവെന്നും മുഖ്യമന്ത്രി ദല്‍ഹിയില്‍ വാര്‍ത്താ സമ്മേളനത്തില്‍ പറഞ്ഞു.
റെയില്‍വേ മന്ത്രിയുമായി സംസാരിക്കാമെന്ന് പ്രധാനമന്ത്രി ഉറപ്പുനല്‍കി. പ്രധാനമന്ത്രിയുടെ കൂടിക്കാഴ്ച കേന്ദ്ര മന്ത്രിയുടെ അനുമതി വേഗത്തിലാകുമെന്നാണ് പ്രതീക്ഷിക്കുന്നത്. അനൗദ്യോഗികമായി റെയില്‍വെ മന്ത്രിയെ കാണാന്‍ കഴിഞ്ഞെന്നും മുഖ്യമന്ത്രി പറഞ്ഞു.
ചീഫ് സെക്രട്ടറിക്കും ജോണ്‍ ബ്രിട്ടാസ് എം.പിക്കും ഒപ്പമാണ് മുഖ്യമന്ത്രി പ്രധാനമന്ത്രിയെ കാണാനെത്തിയത്. കൂടിക്കാഴ്ച്ചയ്ക്ക് ശേഷം മുഖ്യമന്ത്രി തിരികെ കേരളാഹൗസിലെത്തി മാധ്യമങ്ങളെ കാണുകയായിരുന്നു.
Content Highlights: Pinarayi Vijayan says Will not accept anti-development sedition alliance; The struggle formed as part of a political conspiracy should not be caught by the people