കുട്ടികളുമൊത്ത് കാണാന്‍ സാധിക്കാത്ത വയലന്‍സ്, യു/എ സര്‍ട്ടിഫിക്കറ്റ് റദ്ദാക്കണം; ജയിലറിനെതിരെ ഹരജി
എന്റര്‍ടെയിന്‍മെന്റ് ഡെസ്‌ക്
Saturday, 19th August 2023, 12:37 pm
രജിനികാന്ത് ചിത്രം ജയിലറിന്റെ യു/എ സര്‍ട്ടിഫിക്കറ്റ് റദ്ദാക്കാന്‍ സെന്‍ട്രല്‍ ബോര്‍ഡ് ഓഫ് ഫിലിം സര്‍ട്ടിഫിക്കേഷനോട് (സി.ബി.എഫ്.സി) നിര്‍ദേശിക്കണമെന്ന് ആവശ്യപ്പെട്ട് മദ്രാസ് ഹൈക്കോടതിയില്‍ പൊതുതാത്പര്യ ഹരജി. കുട്ടികളോടൊപ്പം കാണാന്‍ പറ്റാത്ത രീതിയിലുള്ള വയലന്‍സ് രംഗങ്ങള്‍ ചിത്രത്തിലുണ്ടായിട്ടും സെന്‍സര്‍ ബോര്‍ഡ് യു/എ സര്‍ട്ടിഫിക്കറ്റ് നല്‍കി എന്ന് പറഞ്ഞാണ് അഭിഭാഷകനായ എം.എല്‍. രവി ഹരജി നല്‍കിയത്.
ഇതേ ചിത്രത്തില്‍ യു.എസിലും യു.കെയിലും എ സര്‍ട്ടിഫിക്കറ്റാണ് നല്‍കിയിരിക്കുന്നതെന്നും ഹരജിക്കാരന്‍ ചൂണ്ടിക്കാട്ടി. സത്യവാങ്മൂലത്തില്‍ തിരക്കഥ വിവരിച്ചുകൊണ്ട് ആളുകളെ കീഴ്‌മേല്‍ തൂക്കിയിട്ട് ചുറ്റിക കൊണ്ട് തല തകര്‍ക്കുന്നതും ചെവി മുറിച്ചുകളയുന്നതും തല വെട്ടിക്കളയുന്നതുമായ രംഗങ്ങളുണ്ടെന്ന് രവി പറഞ്ഞു.
