അപ്പന്‍ എന്ന ചിത്രത്തിന് ശേഷം മജു തിരക്കഥയെഴുതി സംവിധാനം ചെയ്ത ഏറ്റവും പുതിയ ചിത്രമാണ് പെരുമാനി. വ്യത്യസ്തമായ ഒരു ഗ്രാമത്തിന്റെയും അവിടുത്തെ ഒരു കൂട്ടം മനുഷ്യരുടെയും കഥയാണ് ചിത്രം പറയുന്നത്.
ആ ഗ്രാമത്തിലെ വ്യത്യസ്തരായ കുറേ മനുഷ്യരെയാണ് മജു തന്റെ ചിത്രത്തിലൂടെ പ്രേക്ഷകര്‍ക്ക് മുന്നില്‍ എത്തിച്ചത്. ബഷീറിന്റെ കഥകളില്‍ കണ്ടിട്ടുള്ള കഥാപാത്രങ്ങളോടും ഒ.വി. വിജയന്റെ ഖസാക്കിന്റെ ഇതിഹാസത്തിലെ തസ്രാക്കിലെ ആളുകളോടും സാമ്യം തോന്നുന്ന മനുഷ്യരാണ് ഇവര്‍.
ദൃശ്യാവിഷ്‌ക്കരണ രീതി കൊണ്ടും വ്യത്യസ്തമായ കഥ പറച്ചില്‍ കൊണ്ടും വേറിട്ട് നില്‍ക്കുന്ന ചിത്രമാണ് പെരുമാനി. ഒരു ഫാന്റസി ഡ്രാമയായി എത്തിയ ചിത്രത്തില്‍ പ്രധാനകഥാപാത്രങ്ങള്‍ ഉള്‍പെടെ ഒരുപാട് കഥാപാത്രങ്ങള്‍ വന്നുപോകുന്നുണ്ട്. ഇവര്‍ക്കെല്ലാം ഓരോ വിചിത്ര സ്വഭാവങ്ങളാണ് മജു നല്‍കിയിരിക്കുന്നത്.
നാസറിന്റെ ശിങ്കിടിയായി നടന്ന് അയാളെ വഴി തിരിച്ചു വിടുന്ന കഥാപാത്രമാണ് ഉമൈറിന്റേത്. നാസറിന്റെ ഉള്ളിലേക്ക് സംശയങ്ങളുടെ തീ കോരിയിടുന്നതും ഉമൈര്‍ തന്നെയാണ്.
തന്നെ കാക്കകള്‍ കൊത്തുന്നത് പേടിച്ച് ചുവന്ന കൊടിയും കയ്യില്‍ പിടിച്ച് നടക്കുന്ന ആളാണ് കാലിയ. ഇടക്ക് തന്റെ പിന്നാലെ വരുന്ന കാക്കകളെ കാണാതെയാകുമ്പോള്‍ തനിക്ക് വല്ലാത്ത ഒറ്റപ്പെടല്‍ തോന്നുന്നുവെന്ന് പറയുന്ന കാലിയ ചിത്രത്തില്‍ ഏറെ ശ്രദ്ധേയമായ കഥാപാത്രം തന്നെയാണ്.
പെരുമാനിയിലേക്ക് പെട്ടെന്ന് കടന്നുവരുന്ന മറ്റൊരു കഥാപാത്രവുമുണ്ട്. ആളുകള്‍ ഭായിയെന്ന് വിളിക്കുന്ന ഈ കഥാപാത്രത്തിന് പെരുമാനിയില്‍ ഏറെ പ്രാധാന്യമുണ്ട്. ഒരൊറ്റ ഡയലോഗ് പോലും പറയാതെ ആ സിനിമയില്‍ ഉടനീളം വന്നുപോയ ആ കഥാപാത്രത്തിലൂടെയാണ് പെരുമാനിയുടെ കഥ മുന്നോട്ട് പോകുന്നതെന്ന് പോലും തോന്നിയേക്കാം.
Content Highlight: Perumani Village And Strange People In Maju’s World