പെരുമാനിയെന്ന ഒരു ഗ്രാമം, വ്യത്യസ്തരായ കുറേ മനുഷ്യര്‍. ബഷീറിന്റെ കഥകളില്‍ കണ്ടിട്ടുള്ള കഥാപാത്രങ്ങളോടും ഒ.വി. വിജയന്റെ തസ്രാക്കിലെ ആളുകളോടും സാമ്യം തോന്നുന്നവര്‍. വിചിത്ര സ്വഭാവങ്ങളുള്ള കുറേയധികം ആളുകള്‍.
വെള്ളി പല്ലുകളുള്ള ആളുകള്‍ക്കിടയില്‍ വായില്‍ അഞ്ചാറു സ്വര്‍ണപല്ലും സ്വന്തമായി ഒരു ജെ.സി.ബിയുമുള്ള നാസറും കാക്കയെ പേടിച്ച് കയ്യില്‍ ചുവന്ന കൊടിയുമായി നടക്കുന്ന കാലിയയും പെരുമാനിയില്‍ എവിടെ കലഹം നടന്നാലും അറിയുന്ന അബൂട്ടിയും ആളുകളെ എരികയറ്റാന്‍ നടക്കുന്ന പള്ളിയിലെ മുക്രിയുമൊക്കെ ഉള്‍പ്പെടുന്നതാണ് ഈ പെരുമാനി ഗ്രാമം. പെട്ടെന്ന് അവിടേക്ക് കടന്നു വരുന്ന ഒരാളിലൂടെയാണ് പെരുമാനിയുടെ കഥ മാറുന്നത്.
അപ്പന്‍ എന്ന ചിത്രത്തിന് ശേഷം മജു തിരക്കഥയെഴുതി സംവിധാനം ചെയ്ത ഏറ്റവും പുതിയ സിനിമയാണ് പെരുമാനി. വളരെ വ്യത്യസ്തമായ ഗ്രാമത്തിന്റെയും അവിടുത്തെ ഒരു കൂട്ടം മനുഷ്യരുടെയും കഥയാണ് പെരുമാനി പറയുന്നത്.
പെരുമാനിയുടെ മുജിയെന്ന മുജീബായി സണ്ണി വെയ്നും മുജിയുടെ പെങ്ങള്‍ ഫാത്തിമയായി ദീപ തോമസുമാണ് ചിത്രത്തില്‍ എത്തുന്നത്. വിനയ് ഫോര്‍ട്ടാണ് ഫാത്തിമയെ കല്യാണം കഴിക്കാന്‍ നടക്കുന്ന പെരുമാനിയുടെ നാസര്‍.
സിനിമയില്‍ ഉപയോഗിച്ചിരിക്കുന്ന ഓരോ വസ്തുക്കളും കളര്‍ പാറ്റേണും ലൊക്കേഷനുമൊക്കെ പെരുമാനിയുടെ ഭംഗി കൂട്ടുന്നു. ഗോപി സുന്ദറിന്റെ സംഗീതവും എടുത്ത് പറയേണ്ടത് തന്നെയാണ്. അഞ്ചു പാട്ടുകളാണ് പെരുമാനിയില്‍ ഉള്ളത്. സിനിമയ്ക്ക് ഏറെ യോജിക്കുന്നതാണ് അവ ഓരോന്നും. കഥാപാത്രങ്ങള്‍ക്ക് നല്‍കിയിരിക്കുന്ന വ്യത്യസ്തമായ കോസ്റ്റ്യൂമുകളും പെട്ടെന്ന് ശ്രദ്ധിക്കപെടുന്നതാണ്.
ഗ്രാമത്തിലെ ചായകടയുടെ മുന്നില്‍ പെട്ടെന്ന് ഒരു പോസ്റ്റര്‍ പ്രത്യക്ഷപെടുന്നു. നാസറിന്റെയും ഫാത്തിമയുടെയും കല്യാണത്തെ ചുറ്റിപറ്റി വന്ന പോസ്റ്റര്‍ വലിയ ചര്‍ച്ചയാകുന്നു. ഇതിനിടയില്‍ നാട്ടില്‍ ഒരു ബംഗാളി ഭായി കടന്നു വരുന്നു.
ആരാകും ആ പട്ടിയെ കിണറ്റില്‍ ഇട്ടത്? നോട്ടീസ് ഒട്ടിച്ച ആളാകുമോ എന്ന സംശയം നാസറിന് ഉണ്ടാകുന്നു. ആ സംശയം പിന്നീട് ഫാത്തിമയാകുമോ ഇതിന് പിന്നിലെന്ന് രീതിയിലേക്ക് മാറുന്നു. നാസറിന്റെ സംശയം വളരുന്നതിനോടൊപ്പം നാട്ടില്‍ വന്ന ഭായിയെ ചുറ്റിപറ്റി കുറേ അന്ധവിശ്വാസങ്ങളും വളരുന്നു.
സിനിമ കാണുന്നവര്‍ക്ക് ഒരു പിരിമുറുക്കവും ഇല്ലാതെ തുടക്കം മുതല്‍ അവസാനം വരെ പെരുമാനിക്കാരോടൊപ്പം സഞ്ചരിക്കാന്‍ സാധിക്കുന്നു എന്നത് സിനിമയുടെ മേന്മ തന്നെയാണ്. വളരെ ലളിതമായ കഥ പറച്ചിലൂടെ പെരുമാനിയെ മികച്ചതാക്കാന്‍ മജുവിനും സാധിച്ചിട്ടുണ്ട്.