'പെരിയാറും ഇസ്‌ലാമും'; സര്‍വകലാശാലയുടെ സെമിനാര്‍ തടസ്സപ്പെടുത്തി ഹിന്ദുമുന്നണി
ഡൂള്‍ന്യൂസ് ഡെസ്‌ക്
Saturday, 30th October 2021, 12:36 pm
ചെന്നൈ: ‘പെരിയാറും ഇസ്‌ലാമും’എന്ന വിഷയത്തില്‍ തമിഴ്‌നാട്ടിലെ യൂണിവേഴ്‌സിറ്റി നടത്തിയ സെമിനാര്‍ തടസ്സപ്പെടുത്തി സംഘപരിവാര്‍ സംഘടന.
സെമിനാറിനെ കുറിച്ചുള്ള വിവരം തിരുനെല്‍വേലിയിലെ എം.എസ് യൂണിവേഴ്‌സിറ്റി മാധ്യമങ്ങളിലൂടെ അറിയിച്ചതിന് പിന്നാലെ എതിര്‍പ്പുമായി ഹിന്ദുമുന്നണി രംഗത്തെത്തിയിരുന്നു.
‘എം.എസ്.യു ഒരു സര്‍വകലാശാലയാണോ, അതോ ഐ.എസ്.ഐ.എസിന്റെ പരിശീലന കേന്ദ്രമാണോ’ എന്നാണ് ഹിന്ദുമുന്നണി ഫേസ്ബുക്കിലൂടെ ചോദിച്ചത്.
സെമിനാര്‍ തുടങ്ങുന്നതിന് മുന്‍പ് ക്യാംപസിന് പുറത്തെത്തിയ ഹിന്ദുമുന്നണി പ്രവര്‍ത്തകര്‍ ബഹളം വെയ്ക്കുകയും അകത്തേക്ക് കയറ്റിവിടണമെന്ന് ആവശ്യപ്പെടുകയും ചെയ്തു. പൊലീസ് എത്തിയതോടെ ഗവര്‍ണര്‍ക്ക് പരാതി കൊടുക്കുമെന്ന് പറഞ്ഞ് ഹിന്ദുമുന്നണി പ്രവര്‍ത്തകര്‍ തിരിച്ചുപോയി.
സംഘര്‍ഷാവസ്ഥ കാരണം സംഘാടകര്‍ സെമിനാറിന്റെ സമയം കുറച്ചു.
