ചാമ്പ്യന്‍സ് ലീഗില്‍ ഗ്രൂപ്പ് എച്ചില്‍ നടന്ന മത്സരത്തില്‍ ഷാക്തര്‍ ഡോണ്‍സ്റ്റെക്‌സിനെതിരെ പോര്‍ട്ടോക്ക് ആവേശകരമായ ജയം. എട്ട് ഗോളുകള്‍ കണ്ട ത്രില്ലര്‍ പോരാട്ടത്തില്‍ മൂന്നിനെതിരെ അഞ്ച് ഗോളുകള്‍ക്കായിരുന്നു പോര്‍ട്ടോയുടെ വിജയം.
പോര്‍ട്ടോക്കായി ഒരു ഗോള്‍ നേടി മികച്ച പ്രകടനമാണ് പോര്‍ച്ചുഗീസ് താരം പെപെ നടത്തിയത്. തന്റെ 40 വയസിലും പ്രായം തളര്‍ത്താത്ത പോരാട്ടവീര്യമാണ് പെപെ കാഴ്ചവെക്കുന്നത്. മത്സരത്തില്‍ നേടിയ ഗോളോടെ ഒരു തകര്‍പ്പന്‍ നേട്ടമാണ് പെപെ സ്വന്തം പേരിലാക്കി മാറ്റിയത്.
ചാമ്പ്യന്‍സ് ലീഗ് ചരിത്രത്തില്‍ ഗോള്‍ നേടുന്ന എറ്റവും പ്രായം കൂടിയ തരാമെന്ന ചരിത്രനേട്ടത്തിലേക്കാണ് പെപെ കാലെടുത്തുവെച്ചത്. തന്റെ 40 വയസ്സിലാണ് പെപെ ഈ അവിസ്മരണീയ നേട്ടം സ്വന്തം പേരിലാക്കി മാറ്റിയത്.
മത്സരത്തിന്റെ രണ്ടാം പകുതിയില്‍ മത്സരം കൂടുതല്‍ ആവേശകരമായി മാറി. 62ാം മിനിട്ടില്‍ മെഹ്തി ടറാമിയിലൂടെയും 75ാം മിനിട്ടില്‍ പെപെയിലൂടെയും 82ാം മിനിട്ടില്‍ ഫ്രാന്‍സിസ്‌കോ കോന്‍സിയാക്കോ എന്നിവര്‍ പോര്‍ട്ടോക്കായി ഗോളുകള്‍ നേടി.
അതേസമയം 72ാം മിനിട്ടില്‍ സ്റ്റീഫന്‍ ഈസ്റ്റാക്യുവോയുടെ ഓണ്‍ ഗോളും 88ാം മിനിട്ടില്‍ എഗ്യുനാല്‍ഡോയും ഷാക്തറിനായി ഗോളുകള്‍ നേടി.
