ജയ്പൂര്‍: പെഹ്ലു ഖാന്‍ ആള്‍ക്കൂട്ടക്കൊലയില്‍ പുനരന്വേഷണം വേണമെന്ന് രാജസ്ഥാന്‍ സര്‍ക്കാര്‍. കേസില്‍ പ്രതികളായ ആറുപേരെയും അല്‍വാര്‍ വിചാരണക്കോടതി വെറുതെ വിട്ടതിന് പിന്നാലെയാണ് കേസില്‍ പുനരന്വേഷണം വേണമെന്ന് സര്‍ക്കാര്‍ ഉത്തരവിട്ടത്. വിചാരണക്കോടതി വിധിക്കെതിരെ ഹൈക്കോടതിയെ സമീപിക്കാനും മുഖ്യമന്ത്രി അശോക് ഗെഹ്‌ലോട്ടിന്റെ അധ്യക്ഷതയില്‍ ചേര്‍ന്ന മന്ത്രിസഭാ യോഗം തീരുമാനിച്ചു.
പെഹ്ലുഖാന്റെ കുടുംബത്തിന് നീതി നേടിക്കൊടുക്കാന്‍ രാജസ്ഥാന്‍ സര്‍ക്കാര്‍ ചുമതലപ്പെട്ടിരിക്കുകയാണ്. ഈ മാസം രാജസ്ഥാന്‍ സര്‍ക്കാര്‍ ആള്‍ക്കൂട്ട കൊലപാതകത്തിനെതിരെ നിയമം പാസാക്കിയിരുന്നുവെന്നും അശോക് ഗെഹ്ലോട്ട് പറഞ്ഞു.
പെഹ്ലു ഖാന്റെ കുടുംബത്തിന് നീതി ഉറപ്പാക്കണമെന്ന് രാജസ്ഥാന്‍ സര്‍ക്കാരിനോട് എ.ഐ.സി.സി ജനറല്‍ സെക്രട്ടറി പ്രിയങ്ക ഗാന്ധി ആവശ്യപ്പെട്ടിരുന്നു.
സംശയത്തിന്റെ ആനുകൂല്യം നല്‍കിയാണ് ആല്‍വാര്‍ അഡിഷണല്‍ സെഷന്‍സ് കോടതി കേസിലെ ആറു പേരെയും വെറുതെ വിട്ടത്. പെഹ്ലു ഖാന്‍ ആക്രമിക്കപ്പെടുന്നതിന്റെ ദൃശ്യങ്ങള്‍ പുറത്തു വന്നിരുന്നെങ്കിലും ആള്‍ക്കൂട്ട ആക്രമണത്തിന്റെ ദൃശ്യങ്ങള്‍ തെളിവായി സ്വീകരിക്കാനാവില്ലെന്ന് കോടതി പറഞ്ഞിരുന്നു.
പ്രതികളെ വെറുതെവിട്ടത് രാജ്യത്തുടനീളം ആള്‍ക്കൂട്ടക്കൊലകള്‍ വര്‍ധിക്കാന്‍ കാരണമാകുമെന്ന് പെഹ്ലുഖാന്റെ കുടുംബത്തിന്റെ അഭിഭാഷകന്‍ പറഞ്ഞിരുന്നു. കേസില്‍ വിധിപ്രഖ്യാപനം കഴിഞ്ഞ് ഉടനെയായിരുന്നു അഭിഭാഷകനായ അക്തര്‍ ഹുസൈന്‍ ഇക്കാര്യം പറഞ്ഞത്.
പെഹ്ലു ഖാനും സംഘവും 2017 ഏപ്രില്‍ 1നു തന്റെ ഫാമിലേക്ക് പശുക്കളെ വാങ്ങി വരുമ്പോഴായിരുന്നു ഗോ രക്ഷാ ഗുണ്ടകളുടെ ആക്രമണത്തിനിരയായത്.