വരാനിരിക്കുന്ന സമ്മര്‍ ട്രാന്‍സ്ഫറില്‍ ലയണല്‍ മെസി തന്റെ പഴയ തട്ടകമായ ബാഴ്സലോണയിലേക്ക് തിരിച്ചെത്തുമെന്നാണ് ആരാധകര്‍ ഒന്നടങ്കം വിശ്വസിക്കുന്നത്. ബാഴ്സയില്‍ മെസിയുടെ വരവും കാത്തിരിക്കുകയാണ് താരങ്ങളില്‍ പലരും. വിഷയത്തില്‍ തന്റെ അഭിപ്രായം രേഖപ്പെടുത്തിയിരിക്കുകയാണ് ഇപ്പോള്‍ ബാഴ്സലോണ മിഡ് ഫീല്‍ഡര്‍ പെഡ്രി.
മെസിക്കൊപ്പം കളം പങ്കിട്ട നിമിഷങ്ങള്‍ മറക്കാനാവാത്തതാണെന്നും അദ്ദേഹം ബാഴ്സയിലേക്ക് മടങ്ങി വരുമെന്ന് തന്നെയാണ് താന്‍ പ്രതീക്ഷിക്കുന്നതെന്നും പെഡ്രി പറഞ്ഞു. സ്പാനിഷ് ഔട്ലെറ്റായ സ്പോര്‍ട്ടിനോട് പെഡ്രി ഇക്കാര്യങ്ങള്‍ പറഞ്ഞത്.
‘മെസി ബാഴ്സലോണയിലേക്ക് തിരിച്ചെത്താന്‍ ഞാന്‍ ഒത്തിരി ആഗ്രഹിക്കുന്നുണ്ട്. തീര്‍ച്ചയായും അത് മെസിയെയും ബാഴ്സലോണയെയും ആശ്രയിച്ചിരിക്കും. എന്നാലും അദ്ദേഹം തിരിച്ചുവരുമെന്ന് തന്നെയാണ് ഞാന്‍ വിശ്വസിക്കുന്നത്.
ലിസ്ബണില്‍ നടന്ന ചാമ്പ്യന്‍സ് ലീഗിലെ ആദ്യ ദിനത്തില്‍ അധികമാരുമുണ്ടായിരുന്നില്ല. എന്നാല്‍ രണ്ടാമത്തെ ദിവസം എല്ലാവരും എത്തി, മെസിയും ആല്‍ബയും ബുസിയുമൊക്കെയുണ്ടായിരുന്നു. അന്നത്തെ ദിവസം മറക്കാനാവാത്തതാണ്,’ പെഡ്രി പറഞ്ഞു.
ഈ സീസണില്‍ തകര്‍പ്പന്‍ പ്രകടനമാണ് പെഡ്രി കാഴ്ചവെക്കുന്നത്. ബാഴ്സയുടെ ഈ സീസണിലെ ലാ ലിഗ നേട്ടത്തില്‍ നിര്‍ണായക പങ്കുവഹിക്കാന്‍ പെഡ്രിക്ക് സാധിച്ചിരുന്നു. ബാഴ്സക്കായി കളിച്ച 26 ലീഗ് മത്സരങ്ങളില്‍ നിന്ന് ആറ് ഗോളും ഒരു അസിസ്റ്റുമാണ് പെഡ്രിയുടെ സമ്പാദ്യം. കറ്റാലന്‍ ക്ലബ്ബിനായി ഇതുവരെ കളിച്ച 146 മത്സരങ്ങളില്‍ നിന്ന് 20 ഗോളും 15 അസിസ്റ്റുമാണ് താരം അക്കൗണ്ടിലാക്കിയിരിക്കുന്നത്.
അതേസമയം, ഫ്രഞ്ച് വമ്പന്‍മാരായ പി.എസ്.ജി പതിനൊന്നാം തവണയും ലീഗ് വണ്‍ ടൈറ്റില്‍ പേരിലാക്കിയിരിക്കുകയാണ്. സ്ട്രാസ്ബോര്‍ഗിനെതിരെ നടന്ന മത്സരത്തിലാണ് പി.എസ്.ജിയുടെ ജയം. 1-1ന്റെ സമനിലയായ മത്സരത്തില്‍ പാരീസിയന്‍സ് ജയമുറപ്പിക്കുകയായിരുന്നു. ലയണല്‍ മെസിയുടെ തകര്‍പ്പന്‍ ഗോളിലൂടെയായിരുന്നു പി.എസ്.ജി കിരീടം തങ്ങളുടെ തട്ടകത്തിലെത്തിച്ചത്.
ലീഗ് വണ്ണില്‍ പി.എസ്.ജിക്കായി നേടിയ ഗോള്‍ നേട്ടത്തോടെ അഞ്ച് യൂറോപ്യന്‍ ലീഗുകളില്‍ ഏറ്റവും കൂടുതല്‍ സ്‌കോര്‍ ചെയ്യുന്ന താരമായി മാറിയിരിക്കുകയാണ് മെസി. നിലവില്‍ 496 ഗോളുകളാണ് താരത്തിന്റെ അക്കൗണ്ടിലുള്ളത്. ഇതോടെ പോര്‍ച്ചുഗല്‍ ഇതിഹാസം ക്രിസ്റ്റിയാനോ റൊണാല്‍ഡോയുടെ റെക്കോഡ് കൂടി തകര്‍ത്തിരിക്കുകയാണ് മെസി.
പ്രധാനപ്പെട്ട അഞ്ച് യൂറോപ്യന്‍ ലീഗുകളില്‍ ഏറ്റവും കൂടുതല്‍ ഗോള്‍ നേടുന്ന താരമെന്ന ഖ്യാതിയാണ് മെസി പേരിലാക്കിയിരിക്കുന്നത്. ബാഴ്സലോണയില്‍ 474 ലാ ലിഗ ഗോളുകള്‍, പാരീസിയിന്‍സിനായി 22 ലീഗ് വണ്‍ ഗോളുകള്‍ എന്നിങ്ങനെ 496 ഗോളുകളാണ് താരത്തിന്റെ അക്കൗണ്ടിലുള്ളത്.
