ബോര്‍ഡര്‍ – ഗവാസ്‌കര്‍ ട്രോഫിയിലെ ആദ്യ ടെസ്റ്റില്‍ വമ്പന്‍ വിജയമാണ് ഇന്ത്യ സ്വന്തമാക്കിയത്. പെര്‍ത്തിലെ ഒപ്റ്റസ് സ്റ്റേഡിയത്തില്‍ നടന്ന മത്സരത്തില്‍ 295 റണ്‍സിന്റെ പടുകൂറ്റന്‍ ജയമാണ് ഇന്ത്യ സ്വന്തമാക്കിയത്. ആദ്യ ഇന്നിങ്സില് ഇന്ത്യ 150 റണ്‍സിന് ഓള്‍ ഔട്ടായപ്പോള്‍ ഓസീസിനെ 104 റണ്‍സിന് തകര്‍ക്കാന്‍ ഇന്ത്യയ്ക്ക് സാധിച്ചു.
രണ്ടാം ഇന്നിങ്സില് ഇന്ത്യ 487 റണ്‍സ് നേടി വമ്പന്‍ തിരിച്ചുവരവ് നടത്തിയപ്പോള്‍ 534 റണ്‍സിന്റെ ടാര്‍ഗറ്റിന് ഇറങ്ങിയ കങ്കാരുപ്പട 238ന് പുറത്താകുകയായിരുന്നു. ഇന്ത്യയ്ക്ക് നിര്‍ണായകമായത് ക്യാപ്റ്റന്‍ ജസ്പ്രീത് ബുംറയുടെ തകര്‍പ്പന്‍ പ്രകടനമാണ്. ആദ്യ ഇന്നിങ്സില് അഞ്ച് വിക്കറ്റും രണ്ടാം ഇന്നിങ്സില് മൂന്ന് വിക്കറ്റും നേടി ബുംറ തിളങ്ങിയിരുന്നു. ഇതോടെ പ്ലെയര്‍ ഓഫ് ദി മാച്ച് അവാര്‍ഡ് നേടാനും ബുംറയ്ക്ക് സാധിച്ചിരുന്നു.
ഇപ്പോള്‍ താരത്തെ പ്രശംസിച്ച് സംസാരിക്കുകയാണ് ഓസീസ് ക്യാപ്റ്റനും മിന്നും ബൗളറുമായ പാറ്റ കമ്മിന്‍സ്. താരം ലോകത്തെ ഏറ്റവും മികച്ച താരമാണെന്നും എല്ലായിപ്പോഴും വെല്ലുവിളി നിറഞ്ഞ താരമാണെന്നും കമ്മിന്‍സ് പറഞ്ഞു.
‘അദ്ദേഹം നന്നായി പന്തെറിയുമെന്ന് ഞാന്‍ കരുതിയിരുന്നു. അവന്‍ ലോകത്തിലെ ഏറ്റവും മികച്ച താരങ്ങളിലൊരാളാണ്. അവന്‍ എപ്പോഴും ഒരു വെല്ലുവിളിയായിരിക്കും, അതിനാല്‍ അതിനെ ചെറുക്കാനുള്ള വഴികള്‍ ഞങ്ങള്‍ കണ്ടെത്തേണ്ടതുണ്ട്.
ആദ്യ ദിവസം അദ്ദേഹത്തിന്റെ സ്‌പെല്‍ ഉള്‍പ്പെടെ ഞങ്ങളുടെ ടീമിന് നാവിഗേറ്റ് ചെയ്യുന്നത് ബുദ്ധിമുട്ടുള്ളതായിരുന്നു. മിക്ക മത്സരങ്ങളിലും സംഭവിക്കുന്ന പോലെ അദ്ദേഹം നന്നായി ബൗള്‍ ചെയ്തു,’ കമ്മിന്‍സ് മത്സരത്തിന് ശേഷമുള്ള പത്രസമ്മേളനത്തില്‍ പറഞ്ഞു.
രോഹിത് ശര്‍മ ഉള്‍പ്പെടെയുള്ള വന്‍ താരനിര ഇല്ലാതിരുന്നിട്ടും ഇന്ത്യയെ ക്യാപ്റ്റന്‍ സ്ഥാനത്ത് നിന്ന് വിജയിപ്പിക്കാന്‍ ബുംറയ്ക്ക് സാധിച്ചിരിക്കുകയാണ്. ഇതോടെ പെര്‍ത്തില്‍ നടക്കുന്ന ആദ്യ ടെസ്റ്റ് മത്സരത്തില്‍ വിജയം നേടുന്ന ആദ്യ ക്യാപ്റ്റനാകാനും ബുംറയ്ക്ക് സാധിച്ചിരുന്നു.
മത്സരത്തിലെ രണ്ടാം ഇന്നിങ്സില് യശസ്വി ജെയ്സ്വാളിന്റെ മിന്നും ബാറ്റിങ് പ്രകടനത്തില്‍ ഇന്ത്യ വമ്പന്‍ തിരിച്ചുവരവാണ് നടത്തിയത്. 161 റണ്‍സ് നേടി ഓസ്ട്രേലിയയില് തന്റെ ആദ്യ സെഞ്ച്വറി നേടിയായിരുന്നു താരം ക്രിക്കറ്റ് ലോകത്തെ അമ്പരപ്പിച്ചത്. താരത്തിന് പുറകെ കിങ് കോഹ്ലി സെഞ്ച്വറി നേടി പുറത്താകാതെ തന്റെ ഫോം വീണ്ടെടുക്കുകയും ചെയ്തു. കെ.എല്‍.രാഹുല്‍ 77 റണ്‍സും നേടി.
Content Highlight: Pat Cummins Talking About Jasprit Bumrah