തദ്ദേശ തെരഞ്ഞെടുപ്പ് തിരക്കിട്ട് നടത്തില്ല; ഹൈക്കോടതിയില്‍ നിലപാട് അറിയിച്ച് സംസ്ഥാന തെരഞ്ഞെടുപ്പ് കമ്മീഷന്‍
ഡൂള്‍ന്യൂസ് ഡെസ്‌ക്
Tuesday, 8th September 2020, 11:45 am
കൊച്ചി: പഞ്ചായത്ത് തെരഞ്ഞെടുപ്പ് എപ്പോള്‍ നടത്തണമെന്ന് തീരുമാനിച്ചിട്ടില്ലെന്ന് സംസ്ഥാന തെരഞ്ഞെടുപ്പ് കമ്മീഷന്‍ ഹൈക്കോടതിയില്‍. വിശദമായ ചര്‍ച്ചകള്‍ക്ക് ശേഷമേ തീരുമാനമെടുക്കുകയുള്ളൂവെന്നും കമ്മീഷന്‍ ഹൈക്കോടതിയെ അറിയിച്ചു.
സംസ്ഥാനത്ത് കൊവിഡ് മഹാമാരി പടരുന്ന പശ്ചാത്തലത്തില്‍ പഞ്ചായത്ത് തെരഞ്ഞെടുപ്പ് നീട്ടിവെക്കണമെന്നാവശ്യപ്പെട്ട് മലപ്പുറം സ്വദേശിയായ ലത്തീഫ് എന്നയാള്‍ ഹൈക്കോടതിയില്‍ നല്‍കിയ ഹരജിയിലായിരുന്നു സംസ്ഥാന തെരഞ്ഞെടുപ്പ് കമ്മീഷന്‍ നിലപാട് അറിയിച്ചത്.
തെരഞ്ഞെടുപ്പില്‍ മത്സരിക്കണമെന്ന് താന്‍ ആലോചിച്ചിട്ടുണ്ടെന്നും എന്നാല്‍ സംസ്ഥാനത്തും താന്‍ ഉള്‍പ്പെടുന്ന പ്രദേശത്തടക്കം നിരവധി കൊവിഡ് രോഗികളുണ്ടെന്നും ഈ ഘട്ടത്തില്‍ തെരഞ്ഞെടുപ്പ് നടത്തിയാല്‍ അത് വലിയ ദുരന്തത്തിലേക്ക് മാറുമെന്നുമായിരുന്നു ലത്തീഫ് എന്നയാള്‍ സമര്‍പ്പിച്ച ഹരജിയില്‍ പറഞ്ഞത്.
