കോട്ടയം: പാലാ ഉപതെരഞ്ഞെടുപ്പ് അടുത്ത മാസം 23 ന് നടക്കും. 27 നാണ് വോട്ടെണ്ണല്‍. അല്‍പ്പ സമയം മുന്‍പാണ് കേന്ദ്ര തെരഞ്ഞെടുപ്പ് കമ്മീഷന്റെ വിജ്ഞാപനം പുറത്തുവന്നത്. നാല് സംസ്ഥാനങ്ങളിലേക്ക് ഉപതെരഞ്ഞെടുപ്പ് പ്രഖ്യാപിച്ച കൂട്ടത്തിലാണ് പാലായില്‍ തെരഞ്ഞെടുപ്പ് പ്രഖ്യാപിച്ചിരിക്കുന്നത്.
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ
നാലാം തിയതി ബുധനാഴ്ച വരെ പത്രികാ സമര്‍പ്പണം നടക്കും. സെപ്റ്റംബര്‍ അഞ്ചിന് സൂക്ഷ്മ പരിശോധന. ഏഴാം തിയതിയാണ് നാമനിര്‍ദേശ പത്രിക പിന്‍വലിക്കാനുള്ള അവസാന തിയതി.
വട്ടിയൂര്‍കാവ്, അരൂര്‍, എറണാകുളം, കോന്നി, മഞ്ചേശ്വരം, ഉള്‍പ്പെടെ ആറിടത്തേക്ക് ഉപതെരഞ്ഞെടുപ്പ് ഒരുമിച്ച് ഉണ്ടാകുമെന്നായിരുന്നു നേരത്തെ വന്ന റിപ്പോര്‍ട്ടുകള്‍.
എന്നാല്‍ പാലയില്‍ കെ.എം മാണിയുടെ നിര്യാണത്തെ തുടര്‍ന്ന് കഴിഞ്ഞ ആറ് മാസമായി എം.എല്‍.എ ഇല്ലാതായ സാഹചര്യത്തിലാണ് പാലയിലെ ഉപതെരഞ്ഞെടുപ്പ് ആദ്യഘട്ടത്തില്‍ വന്നതെന്നാണ് മുഖ്യ തെരഞ്ഞെടുപ്പ് ഓഫീസര്‍ ടിക്കാറാം മീണ പറഞ്ഞത്.
മറ്റ് അഞ്ചിടങ്ങളിലും നവംബറിലായിരിക്കും ഉപതെരഞ്ഞെടുപ്പ് നടക്കുകയെന്നാണ് അറിയുന്നത്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ\
യു.ഡി.എഫിന്റെ ഉറച്ച കോട്ടയായാണ് ചരിത്രത്തില്‍ പാലാ മണ്ഡലത്തെ രേഖപ്പെടുത്തിയിട്ടുള്ളത്. മണ്ഡലം രൂപീകരിച്ച ശേഷം ഇതുവരേയും പാലായില്‍ നിന്നും കെ.എം മാണിയല്ലാതെ മറ്റൊരാള്‍ അവിടെ നിന്നും ജയിച്ചിട്ടില്ല.
എല്ലാക്കാലത്തും വലിയ ഭൂരിപക്ഷത്തിന് പാലായില്‍ നിന്നും ജയിച്ചിട്ടുള്ള മാണി പക്ഷേ 2016-ലെ നിയമസഭാ തെരഞ്ഞെടുപ്പില്‍ പാലായില്‍ നിന്നും 5000-ത്തില്‍ താഴെ വോട്ടുകള്‍ക്കാണ് ജയിച്ചത്.
എല്‍.ഡി.എഫില്‍ എന്‍.സി.പിയാണ് നിലവില്‍ പാലാ സീറ്റില്‍ മത്സരിച്ചു വരുന്നത്. കഴിഞ്ഞ തവണ മാണിയോട് ശക്തമായി മത്സരിച്ച മാണി സി കാപ്പന്‍ തന്നെ ഇക്കുറിയും അവിടെ മത്സരിക്കാനാണ് സാധ്യത.