കുറ്റവാളികള്‍ മാനസിക വെല്ലുവിളി നേരിടുകയാണെങ്കില്‍ വധശിക്ഷ നടപ്പാക്കരുതെന്ന് പാകിസ്താന്‍ സുപ്രീം കോടതി
ഡൂള്‍ന്യൂസ് ഡെസ്‌ക്
Friday, 12th February 2021, 3:37 pm
ഇസ്‌ലാമാബാദ്: വധശിക്ഷക്ക് വിധിക്കപ്പെട്ട് ജയിലില്‍ കഴിയുന്ന കുറ്റവാളികള്‍ ഗുരുതര മാനസിക വെല്ലുവിളി നേരിടുന്ന അവസ്ഥയിലാണെങ്കില്‍ വധശിക്ഷ നടപ്പാക്കരുതെന്ന് പാകിസ്താന്‍ സുപ്രീം കോടതി. ശിക്ഷാവിധി എന്താണെന്ന് പോലും മനസ്സിലാകാത്തവിധം ഗുരുതര മാനസിക പ്രശ്‌നങ്ങള്‍ ഉള്ളവരെ മരണശിക്ഷക്ക് വിധിക്കുന്നത് നീതിയാവില്ലെന്നാണ് സുപ്രീം കോടതി പ്രസ്താവിച്ചത്.
ബുധനാഴ്ചയാണ് സുപ്രീം കോടതിയിലെ അഞ്ചംഗ ബെഞ്ച് ഈ വിധി പുറപ്പെടുവിച്ചത്. മാനസികമായി വെല്ലുവിളി നേരിടുന്ന മൂന്ന് തടവുകാര്‍ സമര്‍പ്പിച്ച ഹരജി പരിഗണിക്കുമ്പോഴാണ് കോടതി ഇക്കാര്യം വ്യക്തമാക്കിയത്.
‘ശിക്ഷിക്കപ്പെട്ട കുറ്റവാളിക്ക് മാനസിക വെല്ലുവിളി മൂലം ശിക്ഷാവിധിയുടെ കാരണം മനസ്സിലാക്കാന്‍ സാധിക്കുന്നില്ലെങ്കില്‍ വധശിക്ഷ നടപ്പാക്കുന്നത് നീതിക്ക് നിരക്കുന്നതല്ല,’ കോടതി നിരീക്ഷിച്ചു.
