ഇസ്‌ലാമാബാദ്: ഭൂമി തട്ടിപ്പ് കേസിൽ പാകിസ്ഥാൻ മുൻ പ്രധാനമന്ത്രി ഇമ്രാൻ ഖാന് 14 വർഷം തടവ് ശിക്ഷ. ഇമ്രാൻ ഖാനൊപ്പം അദ്ദേഹത്തിന്റെ ഭാര്യ ബുഷ്‌റ ബീബിയെയും ഏഴ് വർഷം തടവിന് വിധിച്ചിട്ടുണ്ട്. 2023 ഓഗസ്റ്റ് മുതൽ ഖാൻ തടവിൽ കിടക്കുന്ന റാവൽപിണ്ടിയിലെ ഗാരിസൺ നഗരത്തിലെ അദില ജയിലിൽ സ്ഥാപിച്ച താത്കാലിക അഴിമതി വിരുദ്ധ കോടതിയാണ് ശിക്ഷ വിധിച്ചത്.
മൂന്ന് തവണ മാറ്റി വെച്ച കേസില്‍ അഴിമതി വിരുദ്ധ കോടതി ജഡ്ജി നാസിര്‍ ജാവേദ് റാണയാണ് വിധി പറഞ്ഞത്.
ദേശീയ അക്കൗണ്ടബിലിറ്റി ബ്യൂറോ (NAB) 2023 ഡിസംബറിൽ ഖാൻ (72), ഭാര്യ ബുഷ്‌റ ബീബി (50) എന്നിവർക്കും മറ്റ് ആറ് പേർക്കുമെതിരെ കേസ് ഫയൽ ചെയ്തിരുന്നു. അല്‍ ഖാദിര്‍ സര്‍വ്വകലാശാല സ്ഥാപിച്ചതില്‍ പൊതു ഖജനാവിന് അയ്യായിരം കോടി രൂപയുടെ നഷ്ടമുണ്ടാക്കിയെന്നാണ് കേസ്. അവർ രാജ്യത്തിന് 190 ദശലക്ഷം പൗണ്ടിൻ്റെ (50 ബില്യൺ PRs) നഷ്ടം വരുത്തിയെന്ന് ദേശീയ അക്കൗണ്ടബിലിറ്റി ബ്യൂറോ പറഞ്ഞു.
ഒരു പ്രോപ്പർട്ടി മുതലാളിയുമായി ഒത്തുതീർപ്പിൻ്റെ ഭാഗമായി യു.കെയിലെ നാഷണൽ ക്രൈം ഏജൻസി പാകിസ്ഥാനിലേക്ക് തിരിച്ചയച്ച 50 ബില്യൺ പി.ആർ തുക ദുരുപയോഗം ചെയ്‌തെന്നതാണ് കേസ്. ഇമ്രാൻ ഖാൻ അധികാരത്തിലിരുന്നപ്പോൾ വെളുപ്പിച്ച പണത്തിന് പകരമായി ഒരു റിയൽ എസ്റ്റേറ്റ് വ്യവസായിയിൽ നിന്ന് ഭൂമി സമ്മാനമായി സ്വീകരിച്ചിരുന്നു.
എന്നാൽ ഖാൻ തെറ്റ് നിഷേധിക്കുകയും 2023ൽ അറസ്റ്റിലായത് മുതൽ തനിക്കെതിരെയുള്ള എല്ലാ ആരോപണങ്ങളും അദ്ദേഹം തിരികെ അധികാരത്തിൽ എത്താതിരിക്കാനുള്ള എതിരാളികളുടെ ഗൂഢാലോചനയാണെന്ന് വാദിക്കുകയും ചെയ്തു.
2022 ഏപ്രിലിൽ പാർലമെൻ്റിൽ നടന്ന അവിശ്വാസ വോട്ടെടുപ്പിൽ ഇമ്രാൻ ഖാനെ പുറത്താക്കിയിരുന്നു. അഴിമതി, ഔദ്യോഗിക രഹസ്യങ്ങൾ വെളിപ്പെടുത്തൽ, വിവാഹ നിയമലംഘനം എന്നീ കുറ്റങ്ങൾ ചുമത്തി മൂന്ന് വ്യത്യസ്ത വിധികളിൽ യഥാക്രമം 10, 14, ഏഴ് വർഷം തടവിന് അദ്ദേഹം ശിക്ഷിക്കപ്പെട്ടിരുന്നു.
Content Highlight: Pakistan’s former PM Imran Khan handed 14-year jail term in land graft case
