ഭുവനേശ്വര്‍: ഒഡീഷ മുഖ്യമന്ത്രിയുടെ വസതിയ്ക്ക് മുന്നില്‍ ഡ്രൈവര്‍മാരുടെ വന്‍പ്രതിഷേധം. 50,000ത്തോളം വരുന്ന ഡ്രൈവര്‍മാരാണ് ‘ഒഡീഷ ഡ്രൈവര്‍ മഹാസംഘ്’ എന്ന പേരില്‍ പദയാത്ര സംഘടിച്ചത്.
അടിസ്ഥാന വേതനം ഉറപ്പാക്കുക, കൊവിഡ് പോരാളികളെന്ന പരിഗണന നല്‍കുക തുടങ്ങി പത്തോളം ആവശ്യങ്ങള്‍ ഉയര്‍ത്തിയാണ് ഡ്രൈവര്‍മാരുടെ പ്രതിഷേധം.
സംസ്ഥാനത്തെ വിവിധ ജില്ലകളില്‍ നിന്നുള്ള ഡ്രൈവര്‍മാര്‍ പ്രതിഷേധത്തില്‍ പങ്കടുക്കുന്നുണ്ട്. മുഖ്യമന്ത്രിയുടെ വസതിയിലേക്കുള്ള മാര്‍ച്ച് പൊലീസ് തടഞ്ഞതിനാല്‍ ഡ്രൈവര്‍മാര്‍ ഗാന്ധി മാര്‍ഗില്‍ ധര്‍ണയും സംഘടിപ്പിച്ചു.
കൊവിഡ് മുന്നണി പോരാളികള്‍ എന്ന പരിഗണനയ്ക്ക് പുറമെ ലൈറ്റ് വെഹിക്കിള്‍ ഡ്രൈവര്‍മാര്‍ക്ക് 15,000 രൂപയും, ഹെവി വെഹിക്കിള്‍ ഡ്രൈവര്‍മാര്‍ക്ക് 20,000 രൂപയും അടിസ്ഥാന വേതനമായി ഉറപ്പാക്കണമെന്നാണ് ഡ്രൈവര്‍മാര്‍ ആവശ്യപ്പെടുന്നത്.
55 വയസ്സ് കഴിഞ്ഞ ഡ്രൈവര്‍മാര്‍ക്ക് മാസം തോറും ഒരു തുക പെന്‍ഷനായി നല്‍കണമെന്നും, ഇന്‍ഷുറന്‍സ് പരിരക്ഷയൊരുക്കണമെന്നും, വിശ്രമമുറികള്‍ പാര്‍ക്കിംഗ് ഏരിയകള്‍ എന്നിവ സജ്ജീകരിക്കണമെന്നും അവര്‍ ആവശ്യപ്പെടുന്നു. അതോടൊപ്പം കൊവിഡ് സാഹചര്യം കണക്കിലെടുത്ത് ലൈസന്‍സിന്റെ കാലാവധി നീട്ടണമെന്നും ആവശ്യമുണ്ട്.
‘അപകടങ്ങളില്‍ ഗുരുതരമായി പരിക്കേല്‍ക്കുകയോ മരണപ്പെടുകയോ ചെയ്യുന്നവരുടെ കുടുംബത്തിന് 10 ലക്ഷം രൂപ ധനസഹായം സര്‍ക്കാര്‍ പ്രഖ്യാപിക്കണം, ന്യായമായ ആവശ്യങ്ങളാണ് ഞങ്ങള്‍ ഉന്നയിക്കുന്നത്,’ പ്രതിഷേധക്കാര്‍ പറയുന്നു.
സെപ്തംബര്‍ ഒന്നിന് ഡ്രൈവേഴ്സ് ദിനത്തില്‍ ഒഡീഷയിലുടനീളമുള്ള ജില്ലാ ഭരണകൂടങ്ങള്‍ക്ക് മുമ്പാകെ നല്‍കിയ പരാതികള്‍ സര്‍ക്കാര്‍ പരിഗണിക്കാത്തതിനെ തുടര്‍ന്നാണ് തങ്ങള്‍ പ്രതിഷേധ സൂചകമായി പദയാത്ര നടത്തുന്നതെന്നും അവര്‍ പറഞ്ഞു.
മൂന്നാഴ്ചയ്ക്കുള്ളില്‍ തങ്ങള്‍ മുന്നോട്ടുവെച്ച ആവശ്യങ്ങള്‍ സര്‍ക്കാര്‍ പരിഗണിച്ചില്ലെങ്കില്‍ പ്രതിഷേധം കടുപ്പിക്കുമെന്നും, നവംബര്‍ 20 മുതല്‍ പണിമുടക്കുമെന്നും ഡ്രൈവര്‍മാര്‍ പറഞ്ഞു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Over 50,000 Odisha drivers protest seeking Covid warrior tag, minimum wage and pension