കൊറോണ വൈറസിനെക്കുറിച്ച് ചൈന 2015 ല്‍ തന്നെ അറിഞ്ഞിരുന്നോ? വിവാദങ്ങള്‍ക്ക് മറുപടി നല്‍കി രാജ്യം
ഡൂള്‍ന്യൂസ് ഡെസ്‌ക്
Monday, 10th May 2021, 9:46 pm
ബീജിങ്: കൊവിഡ് സംബന്ധിച്ച് രാജ്യത്തിനെതിരെ ഉയര്‍ന്നുവരുന്ന വിമര്‍ശനങ്ങളെ തള്ളിക്കളഞ്ഞ് ചൈന.
കൊവിഡ് 19 പകര്‍ച്ചവ്യാധി പൊട്ടിപ്പുറപ്പെടുന്നതിന് അഞ്ച് വര്‍ഷം മുമ്പ് സൈനിക ശാസ്ത്രജ്ഞര്‍ കൊറോണ വൈറസുകളെക്കുറിച്ച് അന്വേഷണം നടത്തിയിരുന്നു എന്നാണ് ചൈനയ്‌ക്കെതിരെ ഉയര്‍ന്നുവന്ന വിമര്‍ശനം. എന്നാല്‍ രാജ്യത്തെ ദുര്‍ബ്ബലമാക്കാനുള്ള അമേരിക്കയുടെ ശ്രമമാണിതെന്നാണ് ചൈനയുടെ പ്രതികരണം.
കൊവിഡ് 19 ന്റെ ഉത്ഭവത്തെക്കുറിച്ചുള്ള അന്വേഷണത്തിന്റെ ഭാഗമായി 2015 ല്‍ ചൈനീസ് സൈനിക ശാസ്ത്രജ്ഞരും മുതിര്‍ന്ന പൊതുജനാരോഗ്യ ഉദ്യോഗസ്ഥരും എഴുതിയ അതീവ രഹസ്യ സ്വഭാവമുള്ള രേഖകള്‍ യു.എസ് സ്റ്റേറ്റ് ഡിപ്പാര്‍ട്ട്‌മെന്റ് ലഭിച്ചതായാണ് റിപ്പോര്‍ട്ടുകള്‍.
പുതിയ യുഗത്തിന്റെ ജനിതക ആയുധമായാണ് കൊറോണ വൈറസിനെ അവതരിപ്പിച്ചതെന്നും റിപ്പോര്‍ട്ടില്‍ പറയുന്നു.
