വൈശാഖന്റെ കേസ് പൊലീസിന് കൈമാറണം; സ്ത്രീ അധിക്ഷേപ പരാതികള്‍ പാര്‍ട്ടിയില്‍ ഒതുക്കേണ്ടതില്ല: സതീശന്‍
ഡൂള്‍ന്യൂസ് ഡെസ്‌ക്
Saturday, 29th July 2023, 11:53 am
തിരവുനന്തപുരം: സി.പി.ഐ.എം നേതാവ് വൈശാഖന്റെ പാര്‍ട്ടിയില്‍ നിന്നുള്ള അവധിയില്‍ പ്രതികരണവുമായി പ്രതിപക്ഷ നേതാവ് വി.ഡി. സതീശന്‍. സ്ത്രീകളെ അധിക്ഷേപിച്ചതിന്റെ പേരിലുള്ള പരാതികള്‍ പാര്‍ട്ടിയില്‍ ഒതുക്കി തീര്‍ക്കേണ്ടതല്ലെന്ന് അദ്ദേഹം മാധ്യമങ്ങളോട് പറഞ്ഞു.
കേസ് പൊലീസിന് കൈമാറണം. പാര്‍ട്ടി തന്നെ പൊലീസ് സ്റ്റേഷനും കോടതിയും ആകേണ്ട. ആലപ്പുഴയിലും തൃശൂരിലും ലഭിച്ചിരിക്കുന്ന പരാതികളില്‍ പാര്‍ട്ടി പരിഹാരം കാണണ്ടെന്നും അദ്ദേഹം പറഞ്ഞു.
‘ഗുരുതരമായ കുറ്റകൃത്യങ്ങളില്‍ പാര്‍ട്ടിയില്‍ നിന്ന് മാറ്റുക, പാര്‍ട്ടിയില്‍ നിന്ന് തരംതാഴ്ത്തുക എന്നൊക്കെയാണ് സി.പി.ഐ.എം ചെയ്യുന്നത്. നമുക്ക് ഒരു നിയമ സംവിധാനങ്ങള്‍ ഇല്ലേ. പാര്‍ട്ടിക്കാരന്‍ അല്ലാത്തവരാണെങ്കില്‍ കേസ് എടുക്കില്ലേ,’ സതീശന്‍ പറഞ്ഞു.
