ഗോവയില്‍ ഒരു മുഴം മുന്നെ എറിയാന്‍ കോണ്‍ഗ്രസ്; ബി.ജെ.പിയെ താഴെയിറക്കാനുള്ള തന്ത്രങ്ങള്‍ ഇങ്ങനെ
ഡൂള്‍ന്യൂസ് ഡെസ്‌ക്
Monday, 7th March 2022, 1:49 pm
പനാജി: ഗോവയില്‍ ഭൂരിപക്ഷം കിട്ടിയില്ലെങ്കില്‍ ബി.ജെ.പി ഒഴികെയുള്ള പാര്‍ട്ടികളുമായി കൈകോര്‍ക്കാന്‍ തയ്യാറാണെന്ന് കോണ്‍ഗ്രസ്.
ഫെബ്രുവരി 14ന് നടന്ന തെരഞ്ഞെടുപ്പിന്റെ ഫലം മാര്‍ച്ച് 10 നാണ് പ്രഖ്യാപിക്കുന്നത്.
ഭൂരിപക്ഷം നേടാന്‍ ആവശ്യമായ 21ല്‍ താഴെ സീറ്റാണ് പാര്‍ട്ടിക്ക് കിട്ടുന്നതെങ്കില്‍ ആം ആദ്മി പാര്‍ട്ടി, മഹാരാഷ്ട്രവാദി ഗോമന്തക് പാര്‍ട്ടി, തൃണമൂല്‍ കോണ്‍ഗ്രസ് തുടങ്ങിയ പാര്‍ട്ടികളുടെ പിന്തുണ തേടാന്‍ തയ്യാറാണെന്ന് ഓള്‍ ഇന്ത്യ കോണ്‍ഗ്രസ് കമ്മിറ്റിയുടെ ഗോവ ഡെസ്‌ക് ഇന്‍ചാര്‍ജ് ദിനേഷ് ഗുണ്ടു റാവു ഞായറാഴ്ച മാധ്യമപ്രവര്‍ത്തകരോട് പറഞ്ഞു.
