തിരുവനന്തപുരം: തെരഞ്ഞെടുപ്പ് ജയിച്ചാല്‍ മുഖ്യമന്ത്രിയെ ഹൈക്കമാന്‍ഡ് തീരുമാനിക്കുമെന്ന മുന്‍ മുഖ്യമന്ത്രി ഉമ്മന്‍ചാണ്ടിയുടെ പ്രസ്താവന രാഷ്ട്രീയ വൃത്തങ്ങളില്‍ ചര്‍ച്ചകളുണ്ടാക്കുന്നു. അടുത്ത വര്‍ഷം നിയമസഭ തെരഞ്ഞെടുപ്പ് നടക്കാനിരിക്കേയുള്ള ഉമ്മന്‍ചാണ്ടിയുടെ പ്രസ്താവനയായതിനാലാണ് ഇത് ചര്‍ച്ചയാവുന്നത്.

പ്രതിപക്ഷ നേതാവെന്ന നിലയില്‍ കോണ്‍ഗ്രസ് മുഖ്യമന്ത്രി സ്ഥാനാര്‍ത്ഥിയായി രമേശ് ചെന്നിത്തലയെയാണ് ഇതുവരെ വിലയിരുത്തപ്പെട്ടിരുന്നത്. എന്നാല്‍ അങ്ങനെ ഒരു തീരുമാനം കോണ്‍ഗ്രസ് നേതൃതലത്തില്‍ എടുത്തിട്ടില്ലെന്ന് പ്രഖ്യാപിക്കുകയാണ് ഉമ്മന്‍ചാണ്ടി ഇന്ന് ചെയ്തത്.

തെരഞ്ഞെടുപ്പ് നടക്കുകയും യു.ഡി.എഫ് വിജയിക്കുകയും ചെയ്തതിന് ശേഷം മാത്രമേ മുഖ്യമന്ത്രി സ്ഥാനാര്‍ത്ഥിയെ തീരുമാനിക്കുകയുള്ളൂ എന്നത് കോണ്‍ഗ്രസ് സംഘടനയെ ഉമ്മന്‍ചാണ്ടി തന്റെ നിലപാട് അറിയിക്കുകയാണ് ഇപ്പോള്‍ ചെയ്തിരിക്കുന്നത് എന്നാണ് വിലയിരുത്തപ്പെടുന്നത്. ഏകപക്ഷീയമായി രമേശ് ചെന്നിത്തല മാത്രമല്ല താനോ മറ്റാരെങ്കിലുമോ മുഖ്യമന്ത്രി സ്ഥാനത്തേക്ക് മത്സരിക്കാനുണ്ടാവും എന്ന സന്ദേശം കൃത്യമായി നല്‍കുകയാണ് ഉമ്മന്‍ചാണ്ടി ചെയ്തത് എന്ന് കോണ്‍ഗ്രസിനകത്ത് സംസാരമുണ്ട്.

പ്രതിപക്ഷ നേതാവെന്ന നിലയില്‍ രമേശ് ചെന്നിത്തലയുടെ ഇതുവരെയുള്ള പ്രവര്‍ത്തനം മികച്ചതാണ്. അത് ഇനിയും തുടരുമെന്നും ഉമ്മന്‍ചാണ്ടി പറഞ്ഞിരുന്നു.