മോളെ തട്ടമിട്ട് വളര്‍ത്തണം; മകളോടൊപ്പമുള്ള പി.കെ ഫിറോസിന്റെ ഫോട്ടോയ്ക്ക് താഴെ 'സൈബര്‍ ആങ്ങളമാര്‍'
ഡൂള്‍ന്യൂസ് ഡെസ്‌ക്
Saturday, 24th April 2021, 5:54 pm
കോഴിക്കോട്: യൂത്ത് ലീഗ് സംസ്ഥാന സെക്രട്ടറി പി.കെ ഫിറോസ് ഇന്‍സ്റ്റഗ്രാമില്‍ പങ്കുവെച്ച ഫോട്ടോക്ക് താഴെ ഉപദേശവുമായി ‘സൈബര്‍ ആങ്ങളമാര്‍’. ഫിറോസ് മകളോടൊപ്പം നില്‍ക്കുന്ന ഫോട്ടോക്ക് താഴെയാണ് മോശമായ കമന്റുകള്‍ പ്രത്യക്ഷപ്പെട്ടത്.
ഫിറോസിന്റെ മകള്‍ തട്ടമിട്ടില്ലെന്നും ഇത് ഇസ്‌ലാമിക രീതികള്‍ക്ക് എതിരാണെന്നുമാണ് കമന്റുകളില്‍ പറയുന്നത്. മുസ്‌ലിം ലീഗുകാരനായ ഫിറോസ് മാതൃകാപരമായ രീതിയില്‍ പെരുമാറണമായിരുന്നുവെന്നും കമന്റുകളില്‍ പറയുന്നു.
മോളെ നല്ല തട്ടമിട്ട് വളര്‍ത്തണം, ഇതൊക്കെ കാണുമ്പോള്‍ ഇപ്പോള്‍ ഞാനൊരു ലീഗുകാരന്‍ ആണ് എന്ന് പറയാന്‍ ലജ്ജ തോന്നുന്നു, നിങ്ങള്‍ പ്രതിനിധാനം ചെയ്യുന്നത് മുസ്‌ലിം ലീഗ് എന്ന സമുദായ പാര്‍ട്ടിയെ ആണ് എന്ന ഓര്‍മ വേണം, മാതൃകയാകേണ്ടവരാണ് എന്ന് ഓര്‍ക്കുന്നത് എന്നാകും, ഇസ്‌ലാമിക വേഷം പ്രോത്സാഹിപ്പിക്കണം തുടങ്ങിയവയൊക്കെയാണ് കമന്റുകള്‍.
