തിരുവനന്തപുരം: വെസ്റ്റിന്‍ഡീസിനെതിരെ തകര്‍പ്പന്‍ ജയം സ്വന്താമക്കിയതിന് പിന്നാലെ ഭിന്നശേഷിക്കാരനായ ആരാധകനെ ചേര്‍ത്ത് പിടിച്ച് ധോണി. തന്നെ കാണാന്‍ ആഗ്രഹിച്ചെത്തിയ ആരാധകന്‍ കാത്തിരിക്കുന്നുവെന്ന് അറിഞ്ഞയുടന്‍ ഗ്രീന്‍ഫീല്‍ഡിലെത്തിയ ധോണി അങ്ങോട്ട് നടന്നു ചെല്ലുകയായിരുന്നു. ഒപ്പം നിന്ന് ചിത്രങ്ങള്‍ എടുത്ത ശേഷം ഓട്ടോഗ്രാഫും നല്‍കിയാണു താരം മടങ്ങിയത്.
എം.എസ് ധോണി ഫാന്‍സ് ഒഫീഷ്യല്‍ എന്ന പേജിലാണ് സംഭവത്തിന്റെ വിഡിയോ പുറത്ത് വന്നത്. വീഡിയോ സോഷ്യല്‍ മീഡിയയില്‍ വൈറലാകുന്നുണ്ട്.
Read Also : ഏകദിനത്തില്‍ “ഡബിള്‍” സെഞ്ച്വറിയുമായി രോഹിത് ശര്‍മ്മ
കഴിഞ്ഞ ദിവസങ്ങളിലായി തങ്ങളുടെ ഇഷ്ടതാരങ്ങളെ ഒരു നോക്കു കാണുന്നതിന് നിരവധി മലയാളി ആരാധകരാണ് കാര്യവട്ടം സ്റ്റേഡിയത്തിലെത്തിയത്. കോഴിക്കോട് വെളിമണ്ണ സ്വദേശി മുഹമ്മദ് ആസിമും കഴിഞ്ഞ ദിവസം താരങ്ങളെ കാണാന്‍ എത്തിയിരുന്നു. തന്റെ ഇഷ്ട താരങ്ങളായ കോഹ്ലിയേയും ധോണിയേയും കാണുക എന്ന ലക്ഷ്യത്തോടെയായിരുന്നു ആസിം എത്തിയത്.
പ്രിയ താരങ്ങളെ കാണാന്‍ മണിക്കൂറുകളോളം ഹോട്ടല്‍ ലീലയുടെ മുന്നില്‍ ആസിം കാത്ത് നിന്നു. പക്ഷെ ആ സ്വപ്നം നടന്നില്ലെങ്കിലും ഇന്ത്യന്‍ താരങ്ങളായ ശിഖര്‍ ധവാനേയും ഉമേഷ് യാദവിനേയും അസീം കണ്ടു. കൂടെ നിന്ന് ചിത്രവുമെടുത്തു. അമ്പലത്തില്‍ നിന്ന് മടങ്ങുകയായിരുന്ന താരങ്ങള്‍ ആസിമിനെ കണ്ടതോടെ കാറില്‍ നിന്ന് ഇറങ്ങിവരികയായിരുന്നു. അതിന്റെ ചിത്രങ്ങളും സോഷ്യല്‍ മീഡിയയില്‍ വൈറലായിരുന്നു.