അഹമ്മദാബാദ്: രണ്ട് ദിവസത്തെ സന്ദര്‍ശനത്തിനായി അമേരിക്കന്‍ പ്രസിഡണ്ട് ഡൊണാള്‍ഡ് ട്രംപ് ഇന്ത്യയിലെത്തിയിരിക്കുകയാണ്. ഗുജറാത്തില്‍ ഗാന്ധിജിയുടെ ആശ്രമമായ സബര്‍മതി സന്ദര്‍ശിച്ചാണ് ട്രംപ് അഹമ്മദാബാദിലെ മൊട്ടേറ സ്റ്റേഡിയത്തിലേക്ക് പോയത്.

ആശ്രമത്തിലെ സന്ദര്‍ശക രജിസ്റ്ററില്‍ പ്രധാനമന്ത്രി നരേന്ദ്രമോദിയെക്കുറിച്ചാണ് ട്രംപ് എഴുതിയത്. പൊതുവേ ആശ്രമം സന്ദര്‍ശിക്കുന്നവര്‍ ഗാന്ധിജിയെക്കുറിച്ചും ഗാന്ധിയന്‍ ആദര്‍ശങ്ങളെക്കുറിച്ചുമാണ് എഴുതാറുള്ളത്.

2015 ല്‍ അന്നത്തെ അമേരിക്കന്‍ പ്രസിഡണ്ട് ബറാക് ഒബാമ, ഗാന്ധിയുടെ അന്ത്യവിശ്രമസ്ഥലമായ രാജ്ഘട്ട് സന്ദര്‍ശിച്ചപ്പോള്‍ മാര്‍ട്ടിന്‍ ലൂതര്‍ കിംഗ് ഗാന്ധിയെക്കുറിച്ച് പറഞ്ഞ വാചകമായിരുന്നു കുറിച്ചത്.

‘ഗാന്ധിയുടെ മൂല്യങ്ങള്‍ ഇന്നും ഇന്ത്യയില്‍ അനശ്വരമാണ്. ലോകത്തിന് തന്നെ അത് വലിയ സമ്മാനമാണ്. എല്ലാ ആളുകളേയും രാജ്യത്തേയും പോലെ നമ്മളും ആ സ്‌നേഹത്തിന്റെ അന്തസത്തയിലായിരിക്കും നിലനില്‍ക്കുന്നത്.’, ഇതായിരുന്നു ഒബാമ കുറിച്ചത്.

അതേസമയം ഈ സന്ദര്‍ശനത്തിന് അവസരമൊരുക്കിയ എന്റെ സുഹൃത്ത് മോദിയ്ക്ക് നന്ദിയെന്നായിരുന്നു ട്രംപ് കുറിച്ചത്.

WATCH THIS VIDEO: