മഴക്കാലത്ത് വെള്ളപ്പൊക്കം പ്രതീക്ഷിക്കുമെന്നല്ലാതെ, സുനാമി വരുമെന്ന് ആരെങ്കിലും കരുതുമോ! കൊവിഡ് കുതിച്ചുയരുന്നതിനിടെ ഹരിയാന മുഖ്യമന്ത്രി
ഡൂള്‍ന്യൂസ് ഡെസ്‌ക്
Wednesday, 28th April 2021, 9:52 pm
ഹരിയാന: കൊവിഡ് പ്രതീക്ഷിക്കാതെ വന്ന സുനാമിയാണെന്ന് ഹരിയാന മുഖ്യമന്ത്രി മനോഹര്‍ ലാല്‍ ഖട്ടര്‍. സംസ്ഥാനത്ത് കൊവിഡ് അതി രൂക്ഷമായി വ്യാപിക്കുന്ന സാഹചര്യത്തിലാണ് ഖട്ടറിന്റെ പ്രതികരണം. മഴക്കാലത്ത് വെള്ളപ്പൊക്കം പ്രതീക്ഷിക്കും എന്നാല്‍ ആരെങ്കിലും സുനാമി പ്രതീക്ഷിക്കുമോ എന്നും ഖട്ടര്‍ ചോദിച്ചു.
കൊവിഡ് ഗുരുതരമായി ബാധിച്ച സംസ്ഥാനങ്ങളില്‍ ഒന്നാണ് ഹരിയാന. ഓക്‌സിജന്‍ ക്ഷാമം മൂലം ഹരിയാനയിലെ ആശുപത്രിയില്‍ അഞ്ച് രോഗികള്‍ കഴിഞ്ഞദിവസം മരിച്ചിരുന്നു.
ഏപ്രില്‍ മാസത്തില്‍ അതിവേഗത്തിലാണ് ഹരിയാനയില്‍ കൊവിഡ് ബാധിച്ചത്. മരണ സഖ്യയും ഉയര്‍ന്നിരുന്നു. കഴിഞ്ഞ വര്‍ഷം 24 മണിക്കൂറില്‍ 3100 കേസുകളാണ് റിപ്പോര്‍ട്ട് ചെയ്തിരുന്നതെങ്കില്‍ ഇത്തവണ നാല് മടങ്ങാണ് വര്‍ദ്ധിച്ചത്.
