എന്റര്‍ടെയിന്‍മെന്റ് ഡെസ്‌ക്Just now
കൊല്‍ക്കത്ത: കൊവിഡ് 19 ന്റെ പശ്ചാത്തലത്തില്‍ സംസ്ഥാനത്തെ സാമ്പത്തിക രംഗത്ത് കൂടുതല്‍ ശ്രദ്ധ പുലര്‍ത്തുന്നതിന്റെ ഭാഗമായി സമ്പത്തിക ശാസ്ത്രത്തില്‍ നോബേല്‍ പുരസ്‌കാരം നേടിയ സാമ്പത്തിക വിദഗ്ധന്‍ അഭിജിത് ബാനര്‍ജിയുടെ നേതൃത്വത്തില്‍ ഉപദേശക സമിതിയെ നിയമിച്ച് പശ്ചിമ ബംഗാള്‍ മുഖ്യമന്ത്രി മമതാ ബാനര്‍ജി. ബംഗാളിന് വേണ്ടി ഒരു ഗ്ലോബല്‍ അഡ്‌വേഴ്‌സറി ബോര്‍ഡിന് നേതൃത്വം നല്‍കുമെന്ന് അഭിജിത് ബാനര്‍ജി പ്രതികരിച്ചു. പ്രശസ്തനായ ഡോക്ടര്‍ അഭിജിത് ചൗധരിയും സമിതിയിലുണ്ട്.
സമിതി ഉടനെത്തന്നെ പ്രവര്‍ത്തനം ആരംഭിക്കുമെന്നും ഡോ അഭിജിത് ചൗധരി ഉടനെത്തുമെന്നും മമതാ ബാനര്‍ജി മാധ്യമങ്ങളോട് പറഞ്ഞു.
ഈ വര്‍ഷമാദ്യം ബംഗാള്‍ സന്ദര്‍ശിച്ചപ്പാള്‍ത്തന്നെ ബംഗാളിനുവേണ്ടി പ്രവര്‍ത്തിക്കാന്‍ താല്‍പര്യമുണ്ടെന്ന് അഭിജിത് ബാനര്‍ജി മമതയെ അറിയിച്ചിരുന്നു. കഴിഞ്ഞ ആഴ്ചയാണ് കൊവിഡിന്റെ പശ്ചാത്തലത്തില്‍ മമത അഭിജിത് ബാനര്‍ജിയോട് സഹായം അഭ്യര്‍ത്ഥിച്ചത്.
സംസ്ഥാനം ഇപ്പോള്‍ത്തന്നെ കടബാധ്യതയിലാണെന്നും കേന്ദ്രത്തിലേക്ക് 50,000 കോടി തിരിച്ചടയ്ക്കാനുണ്ടെന്നും മമത പറഞ്ഞു. 2019ല്‍ ബംഗാളില്‍ പ്രളയമുണ്ടായ സമയത്ത് കേന്ദ്രം പ്രഖ്യാപിച്ചിരുന്ന സാമ്പത്തിക സഹായം ഇതുവരെ സംസ്ഥാനത്തിന് ലഭിച്ചിട്ടില്ലെന്നും അവര്‍ ചൂണ്ടിക്കാട്ടി.
സംസ്ഥാനത്തിന്റെ നിലവിലെ സാമ്പത്തികാവസ്ഥ മനസിലാക്കി പദ്ധതികള്‍ ആലോചിക്കാനാണ് സമിതിക്ക് രൂപം നല്‍കിയിരിക്കുന്നത്.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
ഡൂൾന്യൂസ് യൂട്യൂബ് ചാനൽ സബ്സ്ക്രൈബ് ചെയ്യാനായി ഇവിടെ ക്ലിക്ക് ചെയ്യൂ
