ന്യൂദല്‍ഹി: കര്‍ഷക സമരത്തിന് അന്താരാഷ്ട്രതലത്തിലുള്ള സെലിബ്രിറ്റികള്‍ പിന്തുണയ്ക്കുന്നതിനെതിരെ രംഗത്തുവന്ന ബി.ജെ.പിക്കെതിരെ രൂക്ഷവിമര്‍ശനവുമായി കോണ്‍ഗ്രസ് നേതാവ് അധിര്‍ രഞ്ജന്‍ ചൗധരി.
ട്രംപിന് വേണ്ടി നരേന്ദ്ര മോദി സംസാരിച്ചപ്പോള്‍ ഇത്തരത്തിലുള്ള ചോദ്യങ്ങള്‍ ഉയര്‍ന്നില്ലല്ലോ എന്ന് ചൗധരി ചോദിച്ചു
നമ്മുടെ ദേശീയവാദികളില്‍ ചിലര്‍ അമേരിക്കയില്‍ ചെന്ന് ‘ ആബ് കി ബാര്‍, ട്രംപ് കി സര്‍ക്കാര്‍ ‘ എന്നു പറഞ്ഞു, അതിന്റെ അര്‍ത്ഥമെന്താണ്? പിന്നെ ഇപ്പോള്‍ റിഹാനയും ഗ്രെറ്റ തന്‍ബെര്‍ഗും കര്‍ഷകരോട് ഐക്യദാര്‍ഢ്യം പ്രകടിപ്പിച്ചപ്പോള്‍ നമ്മള്‍ എന്തിനാണ് മുറുമുറുക്കുന്നത് അധിര്‍ രഞ്ജന്‍ ചൗധരി ചോദിച്ചു.
എന്തിനാണ് വിമര്‍ശനത്തെ ഭയപ്പെടുന്നതെന്നും കേന്ദ്രസര്‍ക്കാര്‍ ആത്മപരിശോധന നടത്തണമെന്നും ചൗധരി ആവശ്യപ്പെട്ടു.
കര്‍ഷക സമരത്തിന് അന്താരാഷ്ട്ര തലത്തില്‍ പിന്തുണ ഏറുന്ന സാഹചര്യത്തില്‍ കര്‍ഷകര്‍ക്ക് എതിരേയും കര്‍ഷക സമരത്തെ പിന്തുണയ്ക്കുന്നവര്‍ക്കെതിരേയും പരോക്ഷ വിമര്‍ശനവുമായി അമിത് ഷാ രംഗത്തെത്തിയിരിക്കുന്നത്.
കര്‍ഷക സമരത്തിന് പിന്തുണച്ച പോപ് ഗായിക റിഹാനയ്‌ക്കെതിരെയും പരിസ്ഥി പ്രവര്‍ത്തക ഗ്രേറ്റ തന്‍ബര്‍ഗിനെതിരെയും കേന്ദ്രസര്‍ക്കാരും ബി.ജെ.പിയും രംഗത്തെത്തിയിരുന്നു. ഗ്രെറ്റയ്ക്കെതിരെ ദല്‍ഹി പൊലീസ് എഫ്.ഐ.ആര്‍ എടുക്കുകയും ചെയ്തു.
കര്‍ഷക പ്രതിഷേധത്തിനെതിരെ ഇന്ത്യന്‍ സര്‍ക്കാര്‍ സ്വീകരിക്കുന്ന നടപടിയെ വിമര്‍ശിച്ച് ട്വീറ്റ് ചെയ്തതിന് പിന്നാലെയാണ് ഗ്രെറ്റ തന്‍ബര്‍ഗനെതിരെ ദല്‍ഹി പൊലീസ് കേസെടുത്തത്.
ഇന്ത്യന്‍ പീനല്‍ കോഡിലെ സെക്ഷന്‍ 120 ബി, 153-എ എന്നിവ പ്രകാരമാണ് ദല്‍ഹി പൊലീസ് ഗ്രെറ്റയ്ക്കെതിരെ കേസെടുത്തത്. ഗ്രെറ്റ വിദ്വേഷ പ്രചാരണവും ഗൂഢാലോചനയും നടത്തിയെന്നാണ് പൊലീസ് ആരോപിക്കുന്നത്.
കേസെടുത്താലും താന്‍ എപ്പോഴും കര്‍ഷകര്‍ക്കൊപ്പം തന്നെ എന്നായിരുന്നു ഗ്രെറ്റ പ്രതികരിച്ചത്.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlights: No questions on ‘Abki Baar Trump Sarkar’, why be rattled by Rihanna, Greta, asks Adhir Ranjan Chowdhury