ന്യൂ ദൽഹി:റിപ്പബ്ലിക്ക് ടിവി എഡിറ്റർ ഇൻ ചീഫ് അർണബ് ​ഗോസ്വാമിക്കെതിരായ കേസുകളിൽ മൂന്നാഴ്ച്ചത്തേക്ക് നടപടി പാടില്ലെന്ന് സുപ്രീം കോടതി. റിപ്ലബ്ബിക്ക് ടിവി ചർച്ചയിൽ മഹാരാഷ്ട്രയിലെ പാൽ​ഘർ സംഭവത്തെക്കുറിച്ച് മതസ്പർദ ഉണ്ടാക്കുന്ന തരത്തിലുള്ള അർണബിന്റെ പരാമർശത്തിലും, കോൺ​ഗ്രസ് നേതാവ് സോണിയ ​ഗാന്ധിയെക്കുറിച്ചുമുള്ള വിവാദ പരാമർശത്തിലും രജിസ്റ്റർ ചെയ്ത കേസുകളിലെ തുടർനടപടികളാണ് കോടതി നീട്ടിവെച്ചത്.

വീഡിയോ കോൺഫറൻസിങ്ങ് വഴിയാണ് അർണബ് ​ഗോസ്വാമിക്കെതിരായ കേസിൽ ജസ്റ്റിസുമാരായ ഡി.വൈ ചന്ദ്രചൂഡ്, എം.ആർ.ഷാ എന്നിവർ വാദം കേട്ടത്. നാ​ഗ്പൂരിൽ അർണബ് ​ഗോസ്വാമിക്കെതിരായി ചുമത്തിയ എഫ്.ഐ.ആറിലും കോടതി സ്റ്റേ അനുവദിച്ചു.

അർണബിന് മൂന്നാഴ്ച്ചയ്ക്ക് ശേഷം കോടതിയിൽ മുൻകൂർ ജാമ്യാപേക്ഷ സമർപ്പിക്കാമെന്നും അന്വേഷണവുമായി സഹകരിക്കണമെന്നും കോടതി പറഞ്ഞു.

അഡ്വക്കേറ്റ് പ്ര​ഗ്യ ബാ​ഗേൽ വഴി അർണബ് സമർപ്പിച്ച ഹരജിയിലാണ് കോടതിയുടെ ഉത്തരവ്. അർണബിന് വേണ്ടി കോടതിയിൽ ഹാജരായി മുതിർന്ന അഭിഭാഷകൻ മു​കുൾ റോഹ്ത്താ​ഗി അർണബിന് നേരെ ചുമത്തിയിരിക്കുന്ന കേസ് മാധ്യമ സ്വാതന്ത്ര്യത്തിന് എതിരാണെന്ന് കോടതിയിൽ വാദിച്ചു. രാഷ്ട്രീയമായ ചർച്ചകളിൽ പ്രകോപനപരമായ ചോദ്യങ്ങൾ ഉണ്ടാകുന്നത് സ്വാഭാവികമാണെന്നും മുകുൾ റോഹ്ത്താ​ഗി പറഞ്ഞു.

അതേസമയം വാദിഭാ​ഗത്തിന് വേണ്ടി ഹാജരായ കപിൽ സിബൽ അർണബിന്റെ പ്രസ്താവനകൾ ഹിന്ദുക്കളെ ന്യൂനപക്ഷങ്ങൾക്കെതിരായി തിരിച്ച് മതസ്പർദ ഉണ്ടാക്കുന്ന തരത്തിലുള്ളതാണെന്ന് കോടതിയിൽ പറഞ്ഞു. ഇത് ഒരിക്കലും അഭിപ്രായ സ്വാതന്ത്ര്യത്തിന്റെ പരിധിയിൽ വരില്ലെന്നും അദ്ദേഹം ശക്തമായി വാദിച്ചു.

അർണബ്. ​ഗോസ്വാമിക്കെതിരെ ഛത്തീ​സ്​ഗഢ് മഹാരാഷ്ട്ര, രാജസ്ഥാൻ, തെലങ്കാന, പഞ്ചാബ്, പശ്ചിമ ബം​ഗാൾ എന്നീ സംസ്ഥാനങ്ങളിലും നിരവധി കേസുകൾ രെജിസ്റ്റർ ചെയ്തിട്ടുണ്ട്.

ഡൂള്‍ന്യൂസിനെ ഫേസ്ബുക്ക്, ടെലഗ്രാം, ഹലോ പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക.