'മാപ്പ് പറയില്ല, മിണ്ടാതിരിക്കുന്നത് പോംവഴിയല്ല; കശ്മീര്‍ വിഷയത്തില്‍ ഇന്ത്യയോട് ക്ഷമ ചോദിക്കില്ലെന്ന് മുന്‍ മലേഷ്യന്‍ പ്രധാനമന്ത്രി
ഡൂള്‍ന്യൂസ് ഡെസ്‌ക്
Sunday, 9th August 2020, 9:13 am
കോലാലംപൂര്‍: പൗരത്വ ഭേദഗതി നിയമത്തിനെക്കുറിച്ചും കശ്മീരിന്റെ പ്രത്യേക പദവി എടുത്തുകളഞ്ഞതിനെക്കുറിച്ചുമുള്ള പരാമര്‍ശത്തിന്റെ പേരില്‍ ഇന്ത്യയോട് മാപ്പ് പറയാന്‍ തയ്യാറല്ലെന്ന് മുന്‍ മലേഷ്യന്‍ പ്രധാനമന്ത്രി മഹാതിര്‍ മുഹമ്മദ്.
അനീതികള്‍ക്കെതിരെ സംസാരിച്ചതിന് മാപ്പ് പറയാന്‍ തയ്യാറല്ലെന്നാണ് മഹാതിര്‍ പറഞ്ഞത്.
”ഞാന്‍ പറഞ്ഞതിന് ഞാന്‍ ക്ഷമ ചോദിക്കുന്നില്ല, ഇത് ഇന്ത്യയിലേക്കുള്ള നമ്മുടെ പാം ഓയില്‍ കയറ്റുമതിയെ ബാധിച്ചതില്‍ ഖേദിക്കുന്നു.” ട്വിറ്ററിലുടെ അദ്ദേഹം വ്യക്തമാക്കി.
അത്തരം അനീതികള്‍ക്കെതിരെ സംസാരിക്കുന്നതിന് നല്‍കേണ്ട ഉയര്‍ന്ന വിലയാണോ ഇതെന്ന് തനിക്കറിയില്ലെന്നും മഹാതിര്‍ പറഞ്ഞു.
പൗരത്വ ഭേദഗതി നിയമത്തെക്കുറിച്ചും കശ്മീരിനെക്കുറിച്ചും മഹാതിര്‍ നടത്തിയ പരാമര്‍ശയും ഇരുരാജ്യങ്ങള്‍ക്കിടയിലും നയതന്ത്ര പ്രശ്‌നങ്ങള്‍ ഉണ്ടാക്കിയിരുന്നു.
