നിവിന്‍പോളി പ്രധാനവേഷത്തിലെത്തുന്ന ഗീതു മോഹന്‍ദാസ് ചിത്രം മൂത്തോന്റെ ട്രെയിലര്‍ പുറത്തിറങ്ങി. ഒന്നരമിനിറ്റ് ദൈര്‍ഘ്യമുള്ള ട്രെയിലറാണ് പുറത്തിറങ്ങിയത്.
ലക്ഷ്യദീപുകാരനായ പതിനാലുകാരന്‍ അവന്റെ മുതിര്‍ന്ന സഹോദരനെ തേടി യാത്ര തിരിക്കുന്നതാണ് ചിത്രം. ലക്ഷ്യദ്വീപിലും മുംബൈയിലുമായാണ് സിനിമയുടെ ചിത്രീകരണം. ചിത്രത്തില്‍ ലക്ഷ്യദ്വീപ് ഭാഷയാണ് ഉപയോഗിച്ചിരിക്കുന്നത്.
ടൊറന്റോ ഫിലിം ഫെസ്റ്റിവലില്‍ ചിത്രം നേരത്തെ പ്രദര്‍ശിപ്പിച്ചിരുന്നു.
നിവിന്‍ പോളിക്കൊപ്പം റോഷന് മാത്യു, ഷഷാങ്ക് അറോറ, ശോഭിത ധുലി പാല, ദിലീഷ് പോത്തന്‍ എന്നിവരാണ് ചിത്രത്തിലെ മറ്റു പ്രധാന കഥാപാത്രങ്ങള്‍.
ചിത്രത്തിലെ നായിക ശോഭിത ധുലിപാല നെറ്റിഫ്ളിക്സ് സീരീസുകളിലൂടെ പ്രേക്ഷക പ്രീതി നേടിയ നടിയാണ്. ബോളിവുഡിലെ നാലു സംവിധായകര്‍ ഒരുമിച്ച് സംവിധാനം ചെയ്ത മേഡ് ഇന്‍ ഹെവന്‍ എന്ന സീരീസ് ഏറെ ശ്രദ്ധിക്കപ്പെട്ടിരുന്നു.
ചിത്രത്തിലെ റോഷന്റെ പ്രകടനം കണ്ട് സംവിധായകന്‍ അനുരാഗ് കശ്യപ് റോഷന് ഹിന്ദി സിനിമയില്‍ അവസരം നല്‍കിയതും ഏറെ വാര്‍ത്തയായിരുന്നു.
ബോളിവുഡ് നടന്‍ ഷഷാങ്ക് അറോറ തിത്ലി, ബ്രാഹ്മണ്‍നമന്‍ തുടങ്ങിയ അന്തര്‍ദേശീയ തലത്തില്‍ ശ്രദ്ധിക്കപ്പെട്ട സിനിമകളില്‍ അഭിനയിച്ച നടനാണ്. മേഡ് ഇന്‍ ഹെവന്‍ സീരീസിലും നടന്‍ മികച്ച കഥാപാത്രത്തെ അവതരിപ്പിച്ചിരുന്നു. ഒപ്പം ദീലീഷ് പോത്തന്റെ സാന്നിധ്യവും പ്രേക്ഷകരില്‍ ആകാംക്ഷയുണര്‍ത്തുന്നു.
രാജീവ് രവിയാണ് ചിത്രത്തിന്റെ ഛായാഗ്രഹണം നിര്‍വഹിക്കുന്നത്. ചിത്രത്തിന്റെ ഹിന്ദി സംഭാഷണങ്ങള്‍ എഴുതിയിരിക്കുന്നത് സംവിധായകന്‍ അനുരാഗ് കശ്യപ് ആണ്.
