ന്യൂദല്‍ഹി: ബി.ജെ.പിയില്‍ ചേര്‍ന്ന നടന്‍ സണ്ണി ഡിയോളിനെ ബി.ജെ.പിയിലേക്ക് സ്വാഗതം ചെയ്ത് കൊണ്ട് പ്രതിരോധ മന്ത്രി നിര്‍മ്മലാ സീതാരാമന്‍ ‘യുവ നടന്‍’ എന്ന് വിശേഷിപ്പിച്ചത് സോഷ്യല്‍ മീഡിയയില്‍ തമാശയായി.
ദേശീയതയും രാജ്യസ്‌നേഹവും സിനിമയിലൂടെ അവതരിപ്പിച്ച് ജനഹൃദയങ്ങളില്‍ എങ്ങനെ എത്തിക്കാമെന്ന് ‘ബോര്‍ഡര്‍’ സിനിമയിലൂടെ കാണിച്ചു തന്നയാളാണ് സണ്ണി ഡിയോളെന്ന് പറഞ്ഞ നിര്‍മ്മല സീതാരാമന്‍ താരത്തെ അഭിസംബോധന ചെയ്തത് ‘യങ്’ ‘ഫയര്‍ബ്രാന്‍ഡ്’ എന്നീ വാക്കുകളുപയോഗിച്ചാണ്.
എന്നാല്‍ തന്നെക്കാള്‍ പ്രായമുള്ളയാളെയാണ് നിര്‍മ്മല സീതാരാമന്‍ യുവാവ് എന്ന് വിളിച്ചതെന്നാണ് സോഷ്യല്‍ മീഡിയയില്‍ സംഭവത്തെ കളിയാക്കി കൊണ്ട് പലരും അഭിപ്രായപ്പെട്ടത്.
Young artist?He is older to you!
— Preesha Nath (@eagleeyes3112) April 23, 2019
Young ?????
— Zaid burny?? (@drZaidburny) April 23, 2019
എട്ടു കൊല്ലം കൂടി കഴിഞ്ഞാല്‍ ബി.ജെ.പിയുടെ മാര്‍ഗ നിര്‍ദ്ദേശക് മണ്ഡലില്‍ ഉള്‍പ്പെടുത്തേണ്ടയാളാണെന്ന് സതീഷ് സര്‍വോദയ എന്നയാള്‍ അഭിപ്രായപ്പെട്ടു.
പ്രധാനമന്ത്രി നരേന്ദ്രമോദിക്കൊപ്പം ചേരാന്‍ താന്‍ ആഗ്രഹിക്കുന്നുവെന്നും അടുത്ത അഞ്ചു വര്‍ഷത്തേക്ക് മോദി ഭരണത്തിലെത്തണമെന്നും ബി.ജെ.പിയില്‍ ചേര്‍ന്നതില്‍ പിന്നാലെ സണ്ണി ഡിയോള്‍ പ്രതികരിച്ചിരുന്നു.
