ബെംഗളൂരുവില്‍ മാത്രം അഞ്ച് ദിവസത്തിനിടെ 242 കുട്ടികള്‍ക്ക് കൊവിഡ്; ആശങ്കയില്‍ കര്‍ണാടക
ഡൂള്‍ന്യൂസ് ഡെസ്‌ക്
Wednesday, 11th August 2021, 5:01 pm
ബെംഗളൂരു: കര്‍ണാടകയില്‍ കൂടുതല്‍ കുട്ടികളില്‍ കൊവിഡ് രോഗം പിടിപെടുന്നതായി കണക്കുകള്‍. സര്‍ക്കാര്‍ കണക്കുകള്‍ പ്രകാരം കഴിഞ്ഞ അഞ്ച് ദിവസത്തിനിടെ ബെംഗളുരുവില്‍ മാത്രം ഏകദേശം 242 കുട്ടികള്‍ക്കാണ് കൊവിഡ് ബാധ സ്ഥിരീകരിച്ചത്.
ചൊവ്വാഴ്ച്ച കര്‍ണാടകയില്‍ 1338 പുതിയ കേസുകളും 31 മരണവും സ്ഥിരീകരിച്ചു. കൊവിഡ് മൂന്നാം തരംഗം കുട്ടികളെ ബാധിക്കുമെന്ന തരത്തില്‍ നേരത്തെ വിലയിരുത്തലുണ്ടായിരുന്നു.
കര്‍ണാടകയില്‍ മൂന്നാം തരംഗം തുടങ്ങി എന്ന സൂചനകളും ലഭിക്കുന്നുണ്ട്. കണക്കുകള്‍ പ്രകാരം ഒന്‍പത് വയസില്‍ താഴെയുള്ള 106 കുട്ടികളും ഒന്‍പതിനും പത്തൊന്‍പതിനും ഇടയില്‍ പ്രായമുള്ള 136 കുട്ടികളും കഴിഞ്ഞ അഞ്ച് ദിവസത്തിനുള്ളില്‍ കൊവിഡ് ബാധിതരായി. വരും ദിവസങ്ങളില്‍ കുട്ടികളില്‍ കൊവിഡ് ബാധ ഉയര്‍ന്നേക്കാമെന്ന് ആരോഗ്യ വകുപ്പ് ആശങ്ക പ്രകടിപ്പിച്ചു.
