ശിവസേനയ്ക്ക് മുഖ്യമന്ത്രി സ്ഥാനം, എന്‍.സി.പിയ്ക്ക് ഉപമുഖ്യമന്ത്രി, കോണ്‍ഗ്രസിന് സ്പീക്കര്‍ സ്ഥാനം; മഹാരാഷ്ട്രയില്‍ എന്‍.സി.പി നിര്‍ദേശം ഇങ്ങനെ
മഹാരാഷ്ട്രയില്‍ ശിവസേനയോടൊത്ത് സര്‍ക്കാരുണ്ടാക്കുന്ന കാര്യത്തെ കുറിച്ച് എന്‍.സി.പി അദ്ധ്യക്ഷന്‍ ശരത് പവാറും കോണ്‍ഗ്രസ് ഇടക്കാല അദ്ധ്യക്ഷ സോണിയാ ഗാന്ധിയും തമ്മില്‍ ചര്‍ച്ച നടത്തി. എന്‍.സി.പി ശിവസേന നയിക്കുന്ന സര്‍ക്കാരില്‍ ചേരുകയും കോണ്‍ഗ്രസ് പുറത്ത് നിന്ന് പിന്തുണക്കുകയും ചെയ്യുക, സ്പീക്കര്‍ സ്ഥാനവും ഏറ്റെടുക്കുക എന്നതാണ് എന്‍.സി.പി മുന്നോട്ട് വച്ച ഫോര്‍മുല എന്ന് ഒരു എന്‍.സി.പി നേതാവ് ടൈംസ് ഓഫ് ഇന്ത്യയോട് പറഞ്ഞു. പക്ഷെ ഇതൊക്കെ നടക്കണമെങ്കില്‍ ആദ്യം ശിവസേന ബി.ജെ.പിയുമായുള്ള ബന്ധം തന്നെ അവസാനിപ്പിക്കണമെന്നും അദ്ദേഹം പറഞ്ഞു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
ശിവസേനയും ബി.ജെ.പിയും 1995ല്‍ നടപ്പിലാക്കിയ ഫോര്‍മുല തന്നെയാണ് ഞങ്ങളും മുന്നോട്ട് വെച്ചിരിക്കുന്നത്. ശിവസേന പ്രതിനിധി മുഖ്യമന്ത്രി, എന്‍.സി.പി പ്രതിനിധി ഉപമുഖ്യമന്ത്രി- എന്‍.സി.പി നേതാവ് പറഞ്ഞു.
ശിവസേനയില്‍ നിന്ന് അകന്ന് നില്‍ക്കണമെന്ന തീരുമാനം പിന്‍വലിക്കണമെന്നും സംസ്ഥാന നേതൃത്വത്തോട് സര്‍ക്കാര്‍ രൂപീകരണത്തിന് ശ്രമിക്കാന്‍ അനുവാദം നല്‍കണമെന്നും ശരത് പവാര്‍ സോണിയാ ഗാന്ധിയോട് ആവശ്യപ്പെട്ടിട്ടുണ്ട്. ബി.ജെ.പിയും ശിവസേനയും തമ്മിലുള്ള പിണക്കം ഗൗരവതരമാണെന്നും പവാര്‍ സോണിയയെ ബോധിപ്പിച്ചിട്ടുണ്ട്.
മഹാരാഷ്ട്രയില്‍ സര്‍ക്കാര്‍ രൂപീകരിക്കുന്നതിന്റെ ഉത്തരവാദിത്തം ബി.ജെ.പിക്കാണ്. ശിവസേന തലവന്‍ ഉദ്ദവ് താക്കറെ എന്‍.സി.പിയുടെ സഹായം തേടിയിട്ടില്ല.എന്‍.സി.പിക്ക് ജനങ്ങള്‍ നല്‍കിയ കല്‍പ്പന പ്രതിപക്ഷത്ത് ഇരിക്കാനാണ്.
എന്നാല്‍ ഭാവിയെക്കുറിച്ച് സംസാരിക്കാന്‍ കഴിയില്ലെന്നാണ് ശരത് പവാര്‍ ഇന്നലെ മാധ്യമങ്ങളോട് പ്രതികരിച്ചത്.
ഭാവിയെ കുറിച്ച് സംസാരിക്കാന്‍ കഴിയില്ല എന്ന പവാറിന്റെ വാക്കുകളില്‍ നിലവിലെ ചര്‍ച്ചകളുടെ സൂചനകളുണ്ടെന്നാണ് നിരീക്ഷകരുടെ വിലയിരുത്തല്‍.
ശിവസേന ബി.ജെ.പിയുമായുള്ള എല്ലാ ബന്ധങ്ങളും അവസാനിപ്പിച്ച് വന്നാല്‍ സഖ്യത്തെ കുറിച്ച് ആലോചിക്കാം എന്നാണ് സംസ്ഥാനത്തെ കോണ്‍ഗ്രസ് നേതാക്കളുടെ നിലപാട്. ശിവസേനയുടെ നിലപാടിനനുസരിച്ചായിരിക്കും സംസ്ഥാനത്തെ ഭരണം ആര്‍ക്ക് തീരുമാനിക്കുക.
