സിനിമാപ്രേമികള്‍ക്ക് ഏറെ പ്രിയപ്പെട്ട നടിമാരില്‍ ഒരാളാണ് നയന്‍താര. സംവിധായകന്‍ വിഘ്‌നേഷ് ശിവനുമായുള്ള വിവാഹത്തിന് ശേഷം തന്റെ വിവാഹ വീഡിയോ ഡോക്യുമെന്ററിയായി പുറത്തുവിടുമെന്ന് നയന്‍താര തന്നെ അറിയിച്ചിരുന്നു.
2022 ജൂണിലായിരുന്നു നയന്‍താരയും വിഘ്‌നേഷും വിവാഹിതരായത്. തെന്നിന്ത്യയില്‍ ഇപ്പോള്‍ ഏറെ ആരാധകരുള്ള താരദമ്പതികളാണ് ഇരുവരും. ഇവരുടെ വിവാഹം കഴിഞ്ഞ് വര്‍ഷങ്ങളായിട്ടും വിവാഹ ഡോക്യുമെന്ററിയെ കുറിച്ച് കൂടുതല്‍ വിവരങ്ങളൊന്നും പുറത്ത് വിട്ടിരുന്നില്ല.
നെറ്റ്ഫ്‌ളിക്‌സിലൂടെ പുറത്ത് വിടുന്ന ഈ ഡോക്യുമെന്ററിക്കായി രണ്ടു വര്‍ഷത്തോളമായി നയന്‍താര ആരാധകര്‍ ഏറെ ആകാംക്ഷയോടെ കാത്തിരിക്കുകയാണ്. ‘നയന്‍താര: ബിയോണ്ട് ദ ഫെയറി ടെയില്‍’ എന്ന പേരിലാണ് ഈ ഡോക്യുമെന്ററി എത്തുന്നത്.
ഇപ്പോള്‍ ഡോക്യുമെന്ററി ട്രെയ്‌ലര്‍ പുറത്ത് വിട്ടിരിക്കുകയാണ് നെറ്റ്ഫ്‌ളിക്‌സ്. രണ്ട് മിനിട്ടും 25 സെക്കന്റും ദൈര്‍ഘ്യമുള്ളതാണ് ഈ ട്രെയ്‌ലര്‍. സൗത്ത് ഇന്ത്യയിലെ വന്‍താര നിരകളെ ഉള്‍ക്കൊള്ളിച്ചു കൊണ്ടാണ് ട്രെയ്‌ലര്‍ എത്തിയത്.
റാണാ ദഗ്ഗുബട്ടി, രാധിക ശരത് കുമാര്‍, നാഗാര്‍ജുന, അറ്റ്‌ലീ, നെല്‍സണ്‍ തുടങ്ങിയ നിരവധി താരങ്ങളെ ട്രെയ്‌ലറില്‍ കാണാം. ഒപ്പം നയന്‍താരയുടെ അമ്മ ഓമന കുര്യനുമുണ്ട്. നവംബര്‍ 18ന് നെറ്റ്ഫ്‌ളിക്‌സില്‍ എത്തുന്ന ‘നയന്‍താര: ബിയോണ്ട് ദ ഫെയറി ടെയില്‍’ ഗൗതം മേനോനാണ് സംവിധാനം ചെയ്തിരിക്കുന്നത്.
പ്രേക്ഷകര്‍ ഇതു വരെ കണ്ടിട്ടില്ലാത്ത നയന്‍താരയുടെ ജീവിതവും അഭിനയത്തിലും ജീവിതത്തിലും അവര്‍ നേരിട്ട വെല്ലുവിളികളും ഒടുവില്‍ വിഘ്‌നേഷുമായുള്ള പ്രണയവും വിവാഹവുമാണ് ഡോക്യുമെന്ററിയില്‍ ഉള്‍ക്കൊള്ളിച്ചിരിക്കുന്നത്.
Content Highlight: Nayanthara: Beyond The Fairy Tale Documentary Trailer Out In Netflix