മധു സി. നാരായണന്‍ സംവിധാനം ചെയ്ത് 2019ല്‍ പുറത്തിറങ്ങിയ ചിത്രമായിരുന്നു കുമ്പളങ്ങി നൈറ്റ്‌സ്. ചിത്രത്തില്‍ സൗബിന്‍ ഷാഹിര്‍, അന്ന ബെന്‍, ഷെയിന്‍ നിഗം, ഗ്രേസ് ആന്റണി, ഫഹദ് ഫാസില്‍, ശ്രീനാഥ് ഭാസി, മാത്യു തോമസ് എന്നിവരായിരുന്നു പ്രധാനവേഷത്തിലെത്തിയത്.
മലയാളത്തിലെ മികച്ച ചിത്രങ്ങളിൽ ഒന്നായാണ് കുമ്പളങ്ങി നൈറ്റ്സിനെ വിലയിരുത്തപ്പെടുന്നത്. ചിത്രത്തിൽ ഫഹദ് ഫാസിൽ അവതരിപ്പിച്ച ഷമ്മി എന്ന കഥാപാത്രം വലിയ ശ്രദ്ധ നേടിയിരുന്നു.
ഷമ്മി എന്ന കഥാപാത്രത്തെ കുറിച്ച് സംസാരിക്കുകയാണ് നടിയും ഫഹദിന്റെ പാർട്നറുമായ നസ്രിയ. ഫഹദിന്റെ കഥാപാത്രങ്ങളിൽ തനിക്കേറ്റവും ഇഷ്ടം കുമ്പളങ്ങി നൈറ്റ്സിലെ ഷമ്മിയെയാണെന്നും ആ കഥാപാത്രത്തിന് ഒരുപാട് പെർഫോം ചെയ്യാനുണ്ടെന്നും നസ്രിയ പറയുന്നു. വീട്ടിൽ ഫഹദ് ഫാസിൽ ക്യാരക്ടറായി മാറാറില്ലെന്നും നസ്രിയ പറഞ്ഞു. ജിഞ്ചർ മീഡിയയോട് സംസാരിക്കുകയായിരുന്നു നസ്രിയ.
‘ശരിക്കും ഞാൻ കോമഡിയായിട്ട് ഫഹദിനോട് പറഞ്ഞിട്ടുണ്ട്, ക്യാരക്ടറായി വീട്ടിലേക്ക് കയറി വരരുതെന്ന്. പക്ഷെ പാവം പുള്ളി അങ്ങനെയുള്ള മനുഷ്യനല്ല.
കുമ്പളങ്ങിയിലെ ഷമ്മിയുടെ കഥാപാത്രം എനിക്ക് വലിയ ഇഷ്ടമാണ്. ഒരു പെർഫോമർ എന്ന രീതിയിൽ ഫഹദിന് ഒരുപാട് ചെയ്യാനുള്ള കഥാപാത്രമാണത്. അതിൽ ഒരുപാട് ചെയ്യാനുമുണ്ട്. എനിക്ക് തോന്നുന്നത് ഫഹദിന്റെ ഏറ്റവും ഇഷ്ടമുള്ള കഥാപാത്രം ഷമ്മി തന്നെയാണ്,’നസ്രിയ പറയുന്നു.
അതേസമയം ഒരു ഇടവേളക്ക് ശേഷം നസ്രിയ അഭിനയിക്കുന്ന സൂക്ഷ്മദർശനി എന്ന ചിത്രം റിലീസിനൊരുങ്ങുകയാണ്. അനൗണ്‍സ്‌മെന്റ് മുതല്‍ സിനിമ പ്രേമികള്‍ കാത്തിരിക്കുന്ന ചിത്രമാണ് സൂക്ഷ്മദര്‍ശിനി. ബേസിലും നസ്രിയയും ആദ്യമായി ഒന്നിക്കുന്ന ഈ ചിത്രം സംവിധാനം ചെയ്യുന്നത് എം.സി ജിതിനാണ്‌.
അയല്‍വാസികളായ പ്രിയദര്‍ശിനിയും മാനുവലുമായിട്ടാണ് നസ്രിയയും ബേസിലും ചിത്രത്തിലെത്തുന്നത്. നാല് വര്‍ഷത്തിന് ശേഷം നസ്രിയ അഭിനയിക്കുന്ന മലയാള ചിത്രമാണ് ഇത്. നവംബര്‍ 22നാണ് ചിത്രം തിയേറ്ററുകളില്‍ പ്രദര്‍ശനത്തിനെത്തുന്നത്.
Content Highlight: Nasriya Nazim About Fahad Fazil’s Performance In Kumbalangi Nights