മലയാളികള്‍ക്ക് ഏറെ പ്രിയപ്പെട്ട നടനാണ് നസ്‌ലെന്‍. ഇപ്പോള്‍ നസ്‌ലെന്റേതായി തിയേറ്ററില്‍ എത്തുന്ന ഏറ്റവും പുതിയ ചിത്രമാണ് ആലപ്പുഴ ജിംഖാന. സ്പോര്‍ട്സ് – കോമഡി ഴോണറില്‍ എത്തുന്ന ഈ സിനിമ സംവിധാനം ചെയ്യുന്നത് ഖാലിദ് റഹ്‌മാന്‍ ആണ്.

ബോക്സിങ് പശ്ചാത്തലമാക്കി ഒരുങ്ങിയ സിനിമയില്‍ ജോജോ എന്ന കഥാപാത്രമായിട്ടാണ് നസ്‌ലെന്‍ എത്തുന്നത്. ലുക്മാന്‍, അനഘ രവി, ഗണപതി തുടങ്ങിയവരാണ് നസ്‌ലെന് പുറമെ ഈ ചിത്രത്തില്‍ പ്രധാനവേഷത്തില്‍ എത്തുന്നത്.

അവര്‍ക്ക് ഒപ്പം കോട്ടയം നസീര്‍, സന്ദീപ് പ്രദീപ്, ഫ്രാങ്കോ ഫ്രാന്‍സിസ്, ബേബി ജീന്‍, ശിവ ഹരിഹരന്‍, ഷോണ്‍ ജോയ്, കാര്‍ത്തിക്, നന്ദ നിഷാന്ത് തുടങ്ങിയവരും അഭിനയിക്കുന്നുണ്ട്.

കഴിഞ്ഞ ദിവസമായിരുന്നു നസ്‌ലെനും ആലപ്പുഴ ജിംഖാനയുടെ ടീമും തമിഴ് നടന്‍ ശിവകാര്‍ത്തികേയനെ കണ്ടത്. അവിടെ വെച്ച് സിനിമയുടെ ട്രെയ്‌ലര്‍ ശിവകാര്‍ത്തികേയനെ കാണിക്കുകയും ചെയ്തിരുന്നു.

ഇപ്പോള്‍ ശിവകാര്‍ത്തികേയനെ കുറിച്ച് പറയുകയാണ് നസ്‌ലെന്‍. അദ്ദേഹത്തെ കാണാന്‍ പോകുമ്പോള്‍ ഒരുപാട് എക്‌സൈറ്റഡായിരുന്നുവെന്നും താന്‍ എസ്.കെയുടെ ആരാധകനാണെന്നും നസ്‌ലെന്‍ പറയുന്നു.

‘ശിവകാര്‍ത്തികേയനെ കാണാന്‍ പോകുമ്പോള്‍ ഞങ്ങള്‍ ഒരുപാട് എക്‌സൈറ്റാഡായിരുന്നു. ഞാന്‍ അദ്ദേഹത്തിന്റെ ഫാനാണ്. എനിക്ക് അദ്ദേഹത്തെ ഒരുപാട് ഇഷ്ടമാണ്

അദ്ദേഹത്തിന്റെ സിനിമകളൊക്കെ മിസ് ചെയ്യാതെ കാണുന്ന ആളാണ് ഞാന്‍. എതിര്‍ നീച്ചല്‍, മാന്‍ കരാട്ടൈ, ത്രീ തുടങ്ങി അദ്ദേഹത്തിന്റെ തുടക്കം മുതല്‍ക്കുള്ള സിനിമകള്‍ ഞാന്‍ കണ്ടിട്ടുണ്ട്. അന്ന് മുതല്‍ക്കേ ഞാന്‍ ഫോളോ ചെയ്യുന്നുണ്ട്.

പിന്നെ ഈയിടെ വന്ന അമരനും കണ്ടു. അതിലെ ട്രാന്‍സ്‌ഫോര്‍മേഷനും അദ്ദേഹം ആ കഥാപാത്രത്തെ അവതരിപ്പിച്ചതുമെല്ലാം എനിക്ക് ഇഷ്ടമായി. എനിക്ക് ഒരുപാട് ഇഷ്ടമുള്ള നടനാണ്. വളരെ സ്വീറ്റായ ആളാണ് അദ്ദേഹം,’ നസ്‌ലെന്‍ പറയുന്നു.

Content Highlight: Naslen Talks About Sivakarthikeyan And Alappuzha Gymkhana Movie