നാഗ്പുര്‍: മഹാരാഷ്ട്രയില്‍ മഹാ വികാസ് അഘാഡി സഖ്യം അധികാരത്തിലെത്തിയതിനു തൊട്ടുപിന്നാലെ ബി.ജെ.പി നേതാവും മുന്‍ മുഖ്യമന്ത്രിയുമായ ദേവേന്ദ്ര ഫഡ്‌നാവിസിന് സമന്‍സ്. തെരഞ്ഞെടുപ്പ് സത്യവാങ്മൂലത്തില്‍ തന്റെ പേരിലുള്ള രണ്ട് ക്രിമിനല്‍ക്കേസുകള്‍ മറച്ചുവെച്ചെന്ന കേസിലാണ് ഫഡ്‌നാവിസിന് സമന്‍സ് ലഭിച്ചത്.
നാഗ്പുര്‍ സദര്‍ പൊലീസ് ഇന്‍സ്‌പെക്ടര്‍ മഹേഷ് ബന്‍സോഡെയാണ് ഇക്കാര്യം വാര്‍ത്താ ഏജന്‍സിയായ എ.എന്‍.ഐയോടു സ്ഥിരീകരിച്ചത്. നാഗ്പുര്‍ കോടതി പുറപ്പെടുവിച്ച സമന്‍സ് താന്‍ ഫഡ്‌നാവിസിന്റെ വീട്ടില്‍ക്കൊണ്ടു പോയി നല്‍കിയതായി അദ്ദേഹം വ്യക്തമാക്കി. നാഗ്പുര്‍ എം.എല്‍.എയാണ് ഫഡ്‌നാവിസ്.
സത്യവാങ്മൂലത്തില്‍ കേസുകള്‍ മറച്ചുവെച്ചതിന് ഫഡ്‌നാവിസിനെതിരെ കേസെടുക്കണമെന്നാവശ്യപ്പെട്ട അഭിഭാഷകനായ സതീഷ് ഉകെ നല്‍കിയ ഹരജി ആദ്യം നാഗ്പുര്‍ കോടതി തള്ളിയിരുന്നു. ഇത് ബോംബെ ഹൈക്കോടതി ശരിവെയ്ക്കുകയും ചെയ്തിരുന്നു.
വാര്‍ത്തകള്‍ ടെലഗ്രാമില്‍ ലഭിക്കാന്‍ ഇവിടെ ക്ലിക്ക് ചെയ്യൂ
എന്നാല്‍ ഒക്ടോബര്‍ ഒന്നിന് സുപ്രീം കോടതിയാണ് ഹരജി സ്വീകരിക്കണമെന്ന് മജിസ്‌ട്രേറ്റ് കോടതിയോടു നിര്‍ദ്ദേശിച്ചത്. ജനപ്രാതിനിധ്യ നിയമത്തിലെ 125 എ വകുപ്പ് പ്രകാരമുള്ള കുറ്റമാണിതെന്ന് മജിസ്‌ട്രേറ്റ് എസ്.ഡി മേത്ത നവംബര്‍ നാലിനു വ്യക്തമാക്കിയിരുന്നു.
