ഏതൊക്കെ സിനിമ ഒഴിവാക്കുന്നുവെന്നതിലാണ് ഇനി നിങ്ങള്‍ ബുദ്ധി ഉപയോഗിക്കേണ്ടതെന്ന് പൃഥ്വി പറഞ്ഞു; നാദിര്‍ഷ
എന്റര്‍ടെയിന്‍മെന്റ് ഡെസ്‌ക്
Monday, 26th July 2021, 12:23 pm
കൊച്ചി: അമര്‍ അക്ബര്‍ അന്തോണിയ്ക്ക് ശേഷം ഏത് സിനിമ ഒഴിവാക്കുന്നു എന്നതിലാണ് ഇനി നിങ്ങള്‍ ബുദ്ധി ഉപയോഗിക്കേണ്ടത് എന്ന് പൃഥ്വിരാജ് തന്നോട് പറഞ്ഞിരുന്നുവെന്ന് സംവിധായകനും നടനുമായ നാദിര്‍ഷാ. കൈരളി ടിവിയ്ക്ക് നല്‍കിയ അഭിമുഖത്തിലാണ് അദ്ദേഹത്തിന്റെ പ്രതികരണം.
”ഈ സിനിമയുടെ വിജയം അര്‍ഹിക്കുന്നയാളാണ് നിങ്ങള്‍. ഇതിനുവേണ്ടി നിങ്ങള്‍ ഒരുപാട് പണിയെടുത്തിട്ടുണ്ട്. ചിത്രം ഹിറ്റ് ആകുകയോ ഇല്ലയോ എന്നൊന്നും പറയുന്നില്ല.
പക്ഷെ ഈ ചിത്രത്തിലൂടെ നിങ്ങളിലെ സംവിധായകന്‍ ഒരുപാട് ശ്രദ്ധിക്കപ്പെടും. ഇനി ചെയ്യേണ്ടത്, ഏതൊക്കെ സിനിമ ചെയ്യാതിരിക്കുന്നു എന്നതിലാണ് നിങ്ങളുടെ ബുദ്ധി.
നിങ്ങളെ തേടി ഒരുപാട് സിനിമ വരും. ഒരുപാട് നിര്‍മാതാക്കളും തേടിവരും. അതില്‍ ഏതൊക്കെ നിങ്ങള്‍ കളയുന്നുവെന്നതിലാണ് ബുദ്ധി. അക്കാര്യം നിങ്ങള്‍ സൂക്ഷിക്കണമെന്ന് പൃഥ്വി പറഞ്ഞു,” നാദിര്‍ഷാ പറയുന്നു.
