ചെന്നൈ: തമിഴ്‌നാട്ടിൽ സർക്കാർ ജോലി വേണമെന്നുള്ളവർ തമിഴ് എഴുതാനും വായിക്കാനും അറിഞ്ഞിരിക്കണമെന്ന് മദ്രാസ് ഹൈക്കോടതിയുടെ മധുര ബെഞ്ച്. തമിഴ്‌നാട് വൈദ്യുതി ബോർഡിലെ (ടി.എൻ.ഇ.ബി) ജൂനിയർ അസിസ്റ്റന്റ് നിർബന്ധിത തമിഴ് ഭാഷാ പരീക്ഷ പാസാകാത്തതുമായി ബന്ധപ്പെട്ട കേസിൽ വിധി പറയുകയായിരുന്നു കോടതി.
രണ്ട് വർഷത്തിനുള്ളിൽ ഭാഷാ പരീക്ഷ പാസാകാത്തതിന് ജോലിയിൽ നിന്ന് പിരിച്ചുവിട്ടതിനെ തുടർന്ന് തേനിയിൽ നിന്നുള്ള എം. ജയ്കുമാർ എന്ന ടി.എൻ.ഇ.ബി ജീവനക്കാരൻ കോടതിയിൽ ഹരജി ഫയൽ ചെയ്തിരുന്നു. അച്ഛൻ നാവിക സർവീസിലായിരുന്നതിനാൽ സി.ബി.എസ്.ഇ സ്കൂളുകളിൽ പഠിച്ചതിനാൽ താൻ ഒരിക്കലും തമിഴ് പഠിച്ചിട്ടില്ലെന്നായിരുന്നു അദ്ദേഹത്തിന്റെ വാദം.
ജയ്കുമാർ സമർപ്പിച്ച ഹരജിയിൽ വാദം കേട്ട ജസ്റ്റിസുമാരായ ജി. ജയചന്ദ്രനും ആർ. പൂർണിമയും തമിഴ് അറിയാതെ ഒരു സർക്കാർ ജീവനക്കാരന് എങ്ങനെ പ്രവർത്തിക്കാൻ കഴിയുമെന്ന് ചോദിച്ചു. ‘സർക്കാർ ജീവനക്കാർക്ക് തമിഴ് അറിയില്ലെങ്കിൽ എന്തുചെയ്യാൻ കഴിയും? അവർ ദൈനംദിന ജോലികൾ എങ്ങനെ കൈകാര്യം ചെയ്യും? ഏതൊരു സംസ്ഥാനത്തും സർക്കാർ ജീവനക്കാർ സംസ്ഥാനത്തിന്റെ ഭാഷ അറിഞ്ഞിരിക്കണം. ഇല്ലെങ്കിൽ, എന്തുചെയ്യാൻ കഴിയും?,’ ബെഞ്ച് അഭിപ്രായപ്പെട്ടു.
സർക്കാർ നടത്തുന്ന ഭാഷാ പരീക്ഷ നിശ്ചിത സമയത്തിനുള്ളിൽ പാസാകണമെന്ന് ജഡ്ജിമാർ പറഞ്ഞു. തമിഴ് അറിയാതെ എന്തിനാണ് ഒരാൾ പൊതു ഓഫീസ് ജോലി തേടുന്നതെന്ന് ജഡ്ജിമാർ ചോദിച്ചു. തുടർന്ന് ഇരു കക്ഷികളോടും അന്തിമ വാദത്തിന് തയ്യാറാകാൻ കോടതി നിർദേശിക്കുകയും കേസ് ആറ് ആഴ്ചത്തേക്ക് മാറ്റിവയ്ക്കുകയും ചെയ്തു.
സംസ്ഥാനത്ത് ഭാഷാ യുദ്ധം രൂക്ഷമായ സമയത്താണ് ഈ വിധി വന്നത്. സംസ്ഥാനത്ത് കേന്ദ്രത്തിൽ നിന്ന് വർധിച്ച് വരുന്ന എതിർപ്പുകൾക്കിടയിൽ , മുഖ്യമന്ത്രി എം. കെ. സ്റ്റാലിൻ എൻ.ഇ.പിയോടുള്ള എതിർപ്പിൽ ഉറച്ചുനിന്നു. ത്രിഭാഷാ നയം സംസ്ഥാനത്തിന്മേൽ ഹിന്ദി അടിച്ചേൽപ്പിക്കാനുള്ള കേന്ദ്രത്തിന്റെ മാർഗമാണെന്ന് അദ്ദേഹം പറഞ്ഞു.
Content Highlight: Must learn to read, write Tamil for state government jobs: Madras High Court
