അസമില്‍ ആള്‍ക്കൂട്ട കൊലപാതകം; കന്നുകാലി മോഷണം ആരോപിച്ച് മുസ്‌ലിം യുവാവിനെ തല്ലിക്കൊന്നു
ഡൂള്‍ന്യൂസ് ഡെസ്‌ക്
Tuesday, 15th August 2023, 6:01 pm
സില്‍ച്ചാര്‍: അസമില്‍ കന്നുകാലി മോഷണം ആരോപിച്ച് മുസ്‌ലിം യുവാവിനെ ആള്‍ക്കൂട്ടം തല്ലിക്കൊന്നു. സംഭവവുമായി ബന്ധപ്പെട്ട് ആറ് പേരെ അറസ്റ്റ് ചെയ്തതായി പൊലീസ് ഉദ്യോഗസ്ഥരെ ഉദ്ധരിച്ച് ഹിന്ദുസ്ഥാന്‍ ടൈംസ് റിപ്പോര്‍ട്ട് ചെയ്യുന്നു. അസമിലെ ഹോജായ് ജില്ലയില്‍ ലങ്കാ പൊലീസ് സ്റ്റേഷന്‍ പരിധിയില്‍ ഞായറാഴ്ച പുലര്‍ച്ചെയാണ് സംഭവം.
ബമുന്‍ഗാവ് സ്വദേശി 40കാരനായ ഹിഫ്സുര്‍ റഹ്മാനാണ് മരിച്ചത്. സഞ്ജയ് ദാസ്, നിഖില്‍ ദാസ്, തുളേന്ദ്ര ദാസ്, ഉത്തം ചക്രവര്‍ത്തി, ജയന്ത ചക്രവര്‍ത്തി, സന്ധു മജുംദാര്‍ എന്നിവരെയാണ് പൊലീസ് കസ്റ്റഡിയിലെടുത്തത്. ഇവരെ തിരിച്ചറിഞ്ഞതായും സംഭവത്തില്‍ ഉള്‍പ്പെട്ട കൂടുതല്‍ പേരെ അറസ്റ്റ് ചെയ്യാന്‍ അന്വേഷണം തുടരുകയാണെന്നും ഉദ്യോഗസ്ഥര്‍ പറഞ്ഞു.
