കല്‍പ്പറ്റ : വീണ്ടും LGBTQ + കമ്മ്യൂണിറ്റിയെ അപമാനിക്കുന്ന പ്രസ്താവനയുമായി മുസ്‌ലിം ലീഗ് നേതാവ് കെ.എം. ഷാജി. സെക്‌സിന്റെ ‘വികൃതമായ സംഗതികള്‍’ വ്യാപകമാക്കണമെന്ന് പറയുന്ന സി.പി.ഐ.എമ്മിനൊപ്പം ലീഗിന് ചേരാനാകില്ലെന്ന് ഷാജി പറഞ്ഞു.
വയനാട് കെല്ലൂര്‍ ടൗണില്‍ നടന്ന മുസ്‌ലിം ലീഗ് പൊതുസമ്മേളനത്തില്‍ സംസാരിക്കുകയായിരുന്നു അദ്ദേഹം.
‘ട്രാന്‍സജെന്‍ഡര്‍ സമൂഹത്തിന്റെ കൂടെ ലീഗുണ്ട്. അത് വിചാരിച്ച് ലെസ്ബിയന്‍സിനേയും ഗേയ്‌സിനേയും അംഗീകരിക്കാന്‍ ഞങ്ങള്‍ക്കാകില്ല. അത് മനുഷ്യത്വ വിരുദ്ധമാണ്. പ്രകൃതി വിരുദ്ധമാണ്. അതിനെ പിന്തുണക്കുന്ന സി.പി.ഐ.എമ്മിനൊപ്പം ചേരാന്‍ ലീഗിന് കഴിയില്ല.
ലീഗ് രാഷ്ട്രീയത്തിന്റെ പൊരുള്‍ ഐഡന്റിറ്റി പൊളിറ്റിക്‌സാണ്. എന്റെ അസ്തിത്വം മുസ്‌ലിമാണ്. അത് അഭിമാനമായി മുന്നോട്ടുപോകണമെന്നാണ് ലീഗ് മുന്നോട്ടുവെക്കുന്ന ആശയം. അങ്ങനെ ഐഡന്റിറ്റി പൊളിറ്റിക്‌സ് മുന്നോട്ടുവെക്കുന്ന ഞങ്ങള്‍ക്ക് സി.പി.ഐ.എമ്മുമായി സഹകരിക്കാന്‍ കഴിയില്ല,’ ഷാജി പറഞ്ഞു.
ശരിഅത്ത് വിഷയത്തില്‍ ആരിഫ് മുഹമ്മദ് ഖാനൊപ്പം നിന്ന സി.പി.ഐ.എം നടപടി
കേരളത്തിലെ മുസ്‌ലിങ്ങള്‍ മറക്കില്ലെന്നും ഷാജി പറഞ്ഞു. ആ സി.പി.ഐ.എമ്മിന്റെ കൂടെ ലീഗ് എങ്ങനെയാണ് നില്‍ക്കുകയെന്നും അദ്ദേഹം ചോദിച്ചു.
