പ്രഖ്യാപനം മുതല്‍ക്കേ തന്നെ ഹൈപ്പിന്റെ കൊടുമുടിയില്‍ നിന്ന് റിലീസിന് ശേഷം ബോക്‌സ് ഓഫീസില്‍ വമ്പന്‍ വിജയം നേടിയ ചിത്രമാണ് ലൂസിഫര്‍. മോഹന്‍ലാലിനെ നായകനാക്കി പൃഥ്വിരാജ് സുകുമാരന്‍ ആദ്യമായി സംവിധാനം ചെയ്ത ഈ സിനിമ 2019ലാണ് പുറത്തിറങ്ങിയത്.
മുരളി ഗോപിയായിരുന്നു ലൂസിഫറിന് വേണ്ടി തിരക്കഥ ഒരുക്കിയത്. ആദ്യം ഈ ചിത്രത്തിന് വേണ്ടി തിരക്കഥ എഴുതിയിരുന്നത് രാജേഷ് പിള്ളയായിരുന്നു. ആ പ്രൊജക്റ്റ് ഇനി ഒരു സിനിമയാകാന്‍ സാധ്യതയുണ്ടോ എന്ന ചോദ്യത്തിന് മറുപടി പറയുകയാണ് മുരളിഗോപി. സില്ലിമോങ്ക്സ് മോളിവുഡിന് നല്‍കിയ അഭിമുഖത്തില്‍ സംസാരിക്കുകയായിരുന്നു അദ്ദേഹം.
‘ആ കാര്യം എന്നോട് ഒരിക്കല്‍ ആന്റണി പെരുമ്പാവൂര്‍ ചോദിച്ചിരുന്നു. ആ സിനിമ ചെയ്യാന്‍ താത്പര്യമുണ്ടോയെന്ന് അദ്ദേഹം ചോദിച്ചു. അതിനെ പറ്റി എനിക്ക് അറിയില്ല. സാധ്യതകളുണ്ടോയെന്ന് ചോദിച്ചാല്‍ സിനിമയുടെ കാര്യമായത് കൊണ്ട് ഒന്നും പറയാന്‍ പറ്റില്ല. സിനിമ അങ്ങനെയാണ്. എന്തായാലും ആന്റണി പെരുമ്പാവൂര്‍ ആ പ്രൊജക്റ്റില്‍ താത്പര്യം ഉണ്ടോയെന്ന് ചോദിച്ചിരുന്നു,’ മുരളി ഗോപി പറഞ്ഞു.
മലയാളത്തിലെ വലിയ സാമ്പത്തിക വിജയമായ ലൂസിഫറില്‍ മോഹന്‍ലാല്‍ എത്തിയത് സ്റ്റീഫന്‍ നെടുമ്പള്ളി എന്ന കഥാപാത്രമായിട്ടായിരുന്നു. ഇപ്പോള്‍ പ്രേക്ഷകര്‍ ഏറെ പ്രതീക്ഷയോടെ കാത്തിരിക്കുന്നത് ലൂസിഫറിന്റെ രണ്ടാം ഭാഗമായ എമ്പുരാന് വേണ്ടിയാണ്.
സ്റ്റീഫന്‍ നെടുമ്പള്ളിയെന്ന രാഷ്ട്രീയക്കാരനില്‍ നിന്ന് മാറി ഖുറേഷി അബ്രാം എന്ന അധോലോക നായകനായാണ് മോഹന്‍ലാല്‍ ചിത്രത്തില്‍ എത്തുക. ഈ സിനിമയുടെ ചിത്രീകരണം ഇപ്പോള്‍ പുരോഗമിക്കുകയാണ്. മലയാളം, ഹിന്ദി, തമിഴ്, തെലുങ്ക് ഭാഷകളിലായാണ് എമ്പുരാന് പ്രദര്‍ശനത്തിന് എത്തുന്നത്.
Content Highlight: Murali Gopi Talks About Antony Perumbavoor
