കോഴിക്കോട്: ഭാര്യയെ ജ്യോതിഷികളുടെ അടുത്തേക്കയച്ച് ഭാവിയെ കുറിച്ച് അന്വേഷിക്കുന്ന ആളാണ് മുഖ്യമന്ത്രി പിണറായി വിജയെന്ന് കെ.പി.സി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
തിരിച്ചടി ഭയന്നാണ് മുഖ്യമന്ത്രി ഇപ്പോള്‍ വിശ്വാസികള്‍ക്ക് അനുകൂലമായി സംസാരിക്കുന്നതെന്നും വിശ്വാസികളെ മുറിവേല്‍പ്പിക്കുന്നതാണ് പിണറായിയുടെ ഭാഷയെന്നും മുല്ലപ്പള്ളി പറഞ്ഞു.
കേരളത്തില്‍ തുടര്‍ഭരണം ഉണ്ടാകുമെന്നത് എല്‍.ഡി.എഫിന്റെ വ്യാമോഹമാണെന്നും യു.ഡി.എഫ് അധികാരത്തിലെത്തുമെന്നും മുല്ലപ്പള്ളി രാമചന്ദ്രന്‍ ആവര്‍ത്തിച്ചു.
ഈ തെരഞ്ഞെടുപ്പ് കഴിഞ്ഞാല്‍ സി.പി.ഐ.എമ്മിന്റെ അവസ്ഥ എന്തായിരിക്കുമെന്ന് ഞാന്‍ പറയാതെ തന്നെ ആളുകള്‍ക്ക് അറിയാം. വിഭാഗീയത അതിന്റെ ഉച്ചകോടിയിലെത്തിയിരിക്കുകയാണ്. പിണറായിയെന്ന സര്‍വാധിപതിയെ ചോദ്യം ചെയ്തുകൊണ്ട് പാര്‍ട്ടി പ്രവര്‍ത്തകരും നേതാക്കളും പരസ്യമായി പ്രതികരിച്ചു കഴിഞ്ഞെന്നും മുല്ലപ്പള്ളി പറഞ്ഞു.
കോണ്‍ഗ്രസ്സും ഐക്യജനാധിപത്യമുന്നണിയും അത്യുജ്ജല വിജയം ഈ തെരഞ്ഞെടുപ്പില്‍ കാഴ്ചവെക്കും. എല്ലാ ജയരാജന്മാരും വിജയനെതിരാണ്. അവരെല്ലാം വളരെ ദുഃഖിതരാണ്. പൊട്ടിത്തെറിയുടെ വക്കിലാണ് കമ്യൂണിസ്റ്റ് പാര്‍ട്ടി. അവരുടെ ദുഃഖവും പ്രതിഷേധവും ഞങ്ങള്‍ക്ക് അനുകൂലമായി മാറും.
പിണറായി വിജയന്‍ എല്ലാവരേയും വെട്ടിനിരത്തിയിരിക്കുന്നു. അവസാനം ആരാണ് അദ്ദേഹത്തിന് കൂട്ടുകാരായിട്ടുള്ളത്. ഇപ്പോള്‍, ഞാനും എന്റെ മകളുടെ ഭര്‍ത്താവും മതി, വേറെ ആരും വേണ്ട കേരളത്തിലെ കമ്യൂണിസ്റ്റ് പാര്‍ട്ടിയില്‍ എന്നാണ് അദ്ദേഹം പറയുന്നതെന്നും മുല്ലപ്പള്ളി പറഞ്ഞു.
പാര്‍ട്ടിയില്‍ വെട്ടിനിരത്തല്‍ നടത്തുകയാണ് മുഖ്യമന്ത്രിയെന്നും പൊട്ടിത്തെറിയുടെ വക്കിലാണ് സി.പി.ഐ.എമ്മെന്നും മുല്ലപ്പള്ളി വിമര്‍ശിച്ചു.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlight: Mullappally Ramachandran Against Pinarayi Vijayan