കൊല്‍ക്കത്ത: ഏറെ അഭ്യൂഹങ്ങള്‍ക്കൊടുവില്‍ താന്‍ ബി.ജെ.പി വിടുകയാണെന്ന വാര്‍ത്തയോട് പ്രതികരിച്ച് മുതിര്‍ന്ന പാര്‍ട്ടി നേതാവ് മുകുള്‍ റോയി. താന്‍ ബി.ജെ.പിയില്‍ തന്നെ തുടരുമെന്നും തൃണമൂല്‍ കോണ്‍ഗ്രസില്‍ ചേരുന്നെന്ന വാര്‍ത്ത വ്യാജമാണെന്നും മുകുള്‍ റോയി പറഞ്ഞു.
‘മറ്റ് ചില പാര്‍ട്ടികള്‍ ഉണ്ടാക്കിവിടുന്ന തെറ്റായ പ്രചരണങ്ങളാണത്. ഇക്കാര്യം ചോദിച്ച് എന്നെ ഒരുപാട് ആളുകള്‍ വിളിച്ചു. ഞാന്‍ ബി.ജെ.പിയിലാണ്. ഇവിടെത്തന്നെ തുടരും’, മുകുള്‍ റോയി മാധ്യമങ്ങളോട് പറഞ്ഞു.
മുകുള്‍ റോയി തന്റെ പഴയ പാര്‍ട്ടിയായ തൃണമൂല്‍ കോണ്‍ഗ്രസിലേക്ക് മടങ്ങാനൊരുങ്ങുകയാണെന്നായിരുന്നു പ്രചരിച്ചറിപ്പോര്‍ട്ടുകള്‍. സംസ്ഥാനത്ത് നിയമസഭ തെരഞ്ഞെടുപ്പില്‍ സ്വീകരിക്കേണ്ട തന്ത്രങ്ങളെ കുറിച്ച് ദല്‍ഹിയില്‍ കഴിഞ്ഞ മൂന്നു ദിവസങ്ങളില്‍ യോഗം നടന്നിരുന്നു. ഈ യോഗത്തില്‍ മുകുള്‍ റോയ് പങ്കെടുക്കാതിരുന്നതിനെ തുടര്‍ന്നാണ് അഭ്യൂഹങ്ങള്‍ ശക്തമായത്.
യോഗം നടന്ന ദിവസങ്ങളില്‍ റോയ് ദല്‍ഹിയിലുണ്ടായിരുന്നു. ചൊവ്വാഴ്ച ദല്‍ഹിയിലെത്തിയ റോയ് വെള്ളിയാഴ്ച ബംഗാളിലേക്ക് മടങ്ങുകയായിരുന്നു.
നേരത്തെ തൃണമൂല്‍ കോണ്‍ഗ്രസില്‍ രണ്ടാമനായിരുന്ന റോയ് പാര്‍ട്ടിയുമായി ഇടഞ്ഞ് 2017ലാണ് ബി.ജെ.പിയില്‍ ചേര്‍ന്നത്. മുകുള്‍ റോയ് ബി.ജെ.പിയിലെത്തിയതിനെ തുടര്‍ന്ന് നിരവധി എം.എല്‍.എമാരും നേതാക്കളും മറ്റു പാര്‍ട്ടികളില്‍ നിന്ന് ബി.ജെ.പിയിലെത്തിയിരുന്നു.
കഴിഞ്ഞ ലോക്സഭ തെരഞ്ഞെടുപ്പില്‍ 18 ലോക്സഭ സീറ്റുകളില്‍ വിജയിക്കുവാനും കഴിഞ്ഞിരുന്നു. അതിനെ തുടര്‍ന്ന് മുകുള്‍ റോയിക്ക് പാര്‍ട്ടിയില്‍ മികച്ച സ്ഥാനം നല്‍കുമെന്നാണ് പ്രതീക്ഷിച്ചിരുന്നത്. എന്നാല്‍ സംസ്ഥാന നേതൃത്വത്തിലോ, ദേശീയ നേതൃത്വത്തിലോ മികച്ച സ്ഥാനം നല്‍കാന്‍ ബി.ജെ.പി തയ്യാറായിട്ടില്ല.
ലോക്സഭ തെരഞ്ഞെടുപ്പ് കഴിഞ്ഞ് ഒരു വര്‍ഷം പിന്നിടുമ്പോള്‍ മുകുള്‍ റോയ്ക്ക് ബംഗാള്‍ ബി.ജെ.പിയില്‍ പഴയ സ്വാധീനമില്ല. തൃണമൂല്‍ കോണ്‍ഗ്രസിനകത്ത് കാര്യങ്ങള്‍ നിശ്ചയിച്ചിരുന്നത് പോലെ കെട്ടഴിച്ചു വിടാന്‍ ബി.ജെ.പി നേതൃത്വം തയ്യാറാവുന്നില്ല. ഇതില്‍ മുകുള്‍ റോയ് അസ്വസ്ഥനാണെന്നാണ റിപ്പോര്‍ട്ടുകളും പുറത്തുവന്നിരുന്നു.
ഡൂള്‍ന്യൂസിനെ ഫേസ്ബുക്ക്, ടെലഗ്രാം, പേജുകളിലൂടെയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ