തിരുവനന്തപുരം: പ്രധാനമന്ത്രി നരേന്ദ്രമോദിയെ വിമര്‍ശിച്ച് നടനും എം.എല്‍.എയുമായ മുകേഷ് രംഗത്ത്. പ്രധാനമന്ത്രി മികച്ച നടനാണെന്നായിരുന്നു മുകേഷിന്റെ പരിഹാസം.
മമ്മൂട്ടിയേക്കാളും മോഹന്‍ലാലിനേക്കാളും മികച്ച നടനാണ് പ്രധാനമന്ത്രി നരേന്ദ്രമോദിയെന്ന് പരിഹസിച്ചു കൊണ്ടായിരുന്നു മുകേഷിന്റെ വിമര്‍ശനം. ഇന്നലെ ബജറ്റ് ചര്‍ച്ചയില്‍ നിയമസഭയില്‍ സംസാരിക്കവെയായിരുന്നു മുകേഷ് പ്രധാനമന്ത്രിയെ പരിഹസിച്ചത്.
” നോട്ട് പിന്‍വലിച്ച് ജനങ്ങളെ ദുരിതത്തിലാക്കിയ മോദി അതൊക്കെ ജനങ്ങള്‍ക്ക് ഗുണം ചെയ്‌തെന്ന് നടിക്കുകയാണ്. മമ്മൂട്ടിയേക്കാളും മോഹന്‍ലാലിനേക്കാളും മികച്ച നടനാണ് പ്രധാനമന്ത്രി നരേന്ദ്രമോദി.” മുകേഷ് പറഞ്ഞു.
ദേശീയ സിനിമാ അവാര്‍ഡിന് പരിഗണിച്ചിരുന്നെങ്കില്‍ അദ്ദേഹത്തെ മികച്ച നടനായി തെരഞ്ഞെടുക്കുമായിരുന്നുവെന്നും മുകേഷ് പറഞ്ഞു.
കൊച്ചിയില്‍ നടി ആക്രമിക്കപ്പെട്ട സംഭവത്തില്‍ പ്രതികളെ പെട്ടെന്നു തന്നെ പിടികൂടാന്‍ സര്‍ക്കാരിന് സാധിച്ചെന്നും സംഭവത്തിന് എഴാം നാള്‍ ക്യാമറയ്ക്ക് മുന്നിലെത്താന്‍ നടിയെ പ്രേരിപ്പിച്ചത് ഇതാണെന്നും മുകേഷ് പറഞ്ഞു. ഈ ധീരതയാണ് പെണ്‍കുട്ടികള്‍ പാഠമാക്കേണ്ടതെന്നും അദ്ദേഹം കൂട്ടിച്ചേര്‍ത്തു.