ന്യൂദല്‍ഹി: സി.പി.ഐ.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ ദല്‍ഹിയില്‍ കാലും കുത്തുകയും നിശ്ചയിച്ച പരിപാടിയിലും പങ്കെടുക്കുകയും ചെയ്യുമെന്ന് ഡി.വൈ.എഫ് ഐ അഖിലേന്ത്യ പ്രസിഡന്റ് പി.എ മുഹമ്മദ് റിയാസ്.
കോടിയേരി ബാലകൃഷ്ണനെ ദല്‍ഹിയില്‍ കാലുകുത്താന്‍ അനുവദിക്കില്ലെന്ന യുവമോര്‍ച്ചയുടെ ഭീഷണിക്കെതിരെ പ്രതികരിക്കുകയായിരുന്നു റിയാസ്. ഫേസ്ബുക്കിലിട്ട പോസ്റ്റിലാണ് മുഹമ്മദ് റിയാസിന്റെ പ്രതികരണം.
കണ്ണൂരില്‍ ബിജെപിക്കെതിരെ അക്രമം തുടര്‍ന്നാല്‍ കോടിയേരിക്കെതിരേ പ്രതിഷേധിക്കുമെന്ന് ദല്‍ഹി യുവമോര്‍ച്ച നേതാവ് സുനില്‍ യാദവ് വ്യക്തമാക്കിയിരുന്നു.
ബിജെപി ദല്‍ഹി കേരള ഹൗസിനുമുന്നില്‍ സംഘടിപ്പിച്ച യോഗത്തിലാണ് യുവമോര്‍ച്ച നേതാവ് ഭീഷണിയുയര്‍ത്തിയത്. കോടിയേരിയെ കാലുകുത്താന്‍ അനുവദിക്കില്ലെന്ന പ്രസ്താവനക്കെതിരെ വലിയ പ്രതിഷേധം ഉയര്‍ന്നിരുന്നു.