ഡൂള്‍ന്യൂസ് ഡെസ്‌ക്50 min
ന്യൂദല്‍ഹി: താജ്മഹല്‍ പണിതത് ഇന്ത്യയിലെ തൊഴിലാളികളാണെന്നും മുഗളന്‍മാര്‍ ഇന്ത്യയിലേക്ക് പോക്കലിറ്റിട്ട് കൊണ്ടുവന്നതല്ല താജ്മഹലെന്നും ബി.ജെ.പി നേതാവ് ഷാനവാസ് ഹുസൈന്‍.
താജ്മഹലിനെ യു.പിയിലെ ടൂറിസം ബുക്ക്‌ലെറ്റില്‍ നിന്നും ഒഴിവാക്കിയ യു.പി സര്‍ക്കാരിന്റെ നടപടിയെ ചോദ്യം ചെയ്യേണ്ടതില്ലെന്നും അദ്ദേഹം പറഞ്ഞു.
താജ്മഹല്‍ നിര്‍മിച്ചത് രാജ്യദ്രോഹികളാണെന്ന ബി.ജെ.പി എം.എല്‍.എ സംഗീത് സോമിന്റെ പ്രസ്താവനയെ കുറിച്ചുള്ള ചോദ്യത്തിനായിരുന്നു ഇദ്ദേഹത്തിന്റെ മറുപടി.
ഇന്ത്യയിലെ കരകൗശലതൊഴിലാളികളുടെ വലിയ ജോലിയാണ് താജ്മഹല്‍. താജ്മഹല്‍ പോലെ മറ്റൊരു മഹാത്ഭുതം ഇനി ഉണ്ടാകാതിരിക്കാനായിരുന്നു അത് പണിതയാളുടെ കൈ ഷാജഹാന്‍ വെട്ടിയത്. താജ്മഹലിനെ യോഗി ആദിത്യനാഥ് തന്നെ ഉയര്‍ത്തിക്കാട്ടിയതാണെന്നും ഹുസൈന്‍ പറയുന്നു.
ബി.ജെ.പി സര്‍ക്കാര്‍ അധികാരത്തിലെത്തിയതിന് പിന്നാലെ യു.പിയില്‍ അഴിമതി കുറഞ്ഞെന്നും സംസ്ഥാനത്തെ ക്രമസമാധാന നില മുമ്പത്തേക്കാള്‍ മെച്ചപ്പെട്ടെന്നുമാണ് ഇദ്ദേഹത്തിന്റെ വാദം.
