രാം ചരണും ജൂനിയര്‍ എന്‍.ടി.ആറും പ്രധാന കഥാപാത്രങ്ങളായെത്തുന്ന രാജമൗലി ചിത്രം ആര്‍.ആര്‍.ആറിന്റെ റിലീസ് പ്രഖ്യാപിച്ചു. ഒക്ടോബര്‍ 13നാണ് ചിത്രം തിയേറ്ററുകളിലെത്തുക. നേരത്തെ ജനുവരി എട്ടിനായിരുന്നു ചിത്രത്തിന്റെ റിലീസ് പ്രഖ്യാപിച്ചിരുന്നത്. പക്ഷെ കൊവിഡിനെ തുടര്‍ന്ന് ഷൂട്ട് നീണ്ടുപോകുകയായിരുന്നു.
ചിത്രത്തിന്റെ റിലീസ് തിയതിയെകുറിച്ച് പല അഭ്യൂഹങ്ങളും വന്നിരുന്നു. ഇപ്പോള്‍ ചിത്രത്തിന്റെ റിലീസ് തിയതി അണിയറ പ്രവര്‍ത്തകര്‍ തന്നെ പ്രഖ്യാപിച്ചതോടെ വലിയ ആവേശത്തിലാണ് ആരാധകര്‍.
‘വെള്ളത്തിന്റെയും തീയുടെയും തടയാനാകാത്ത ആ ശക്തി അനുഭവിച്ചറിഞ്ഞോളൂ’ എന്നാണ് രാജമൗലി റിലീസ് തിയതി പ്രഖ്യാപിച്ചുകൊണ്ട് ട്വീറ്റ് ചെയ്തത്.
ഇന്ത്യന്‍ സിനിമയിലെ ഏറ്റവും വലിയ കൂട്ടുകെട്ടായ ഈ ചിത്രം മറക്കാനാകാത്ത അനുഭവമായിരിക്കുമെന്നാണ് ആര്‍.ആര്‍.ആര്‍ ടീം ട്വീറ്റ് ചെയ്തത്.
രാം ചരണിനും ജൂനിയര്‍ എന്‍.ടി.ആറിനും പുറമേ ആലിയ ഭട്ടും അജയ് ദേവ്ഗണും ചിത്രത്തില്‍ പ്രധാന വേഷങ്ങളിലെത്തുന്നുണ്ട്. തമിഴ്, തെലുങ്ക്, ഹിന്ദി, കന്നട, മലയാളം എന്നീ ഭാഷകള്‍ക്ക് പുറമെ വിദേശ ഭാഷകളിലും ചിത്രം ഇറങ്ങുന്നുണ്ട്.
നേരത്തെ ചിത്രത്തിന്റെ ക്ലൈമാക്‌സ് ഷൂട്ടിന്റെ വാര്‍ത്തകള്‍ പുറത്തുവന്നിരുന്നു. ‘CLIMAX ഷൂട്ട് ആരംഭിച്ചു! എന്റെ രാമരാജുവും ഭീമും ഒത്തുചേര്‍ന്ന് അവര്‍ നേടാന്‍ ആഗ്രഹിച്ച കാര്യങ്ങള്‍ നിറവേറ്റുന്നു… #RRRMovie #RRR ‘ എന്ന് അടികൂറിപ്പോടെയാണ് സംവിധായകന്‍ ക്ലൈമാക്‌സ് രംഗത്തിന്റെ പോസ്റ്റര്‍ പങ്കുവെച്ചത്.
ജൂനിയര്‍ എന്‍.ടി.ആര്‍ കൊമരു ഭീം ആയും രാം ചരണ്‍ അല്ലൂരി സീതരാമ രാജുവായിട്ടുമാണ് ചിത്രത്തില്‍ എത്തുന്നത്. ചിത്രത്തില്‍ സീത എന്ന കഥാപാത്രത്തിനെയാണ് ആലിയ അവതരിപ്പിക്കുന്നത്.
ചരിത്രവും ഫിക്ഷനും കൂട്ടിചേര്‍ത്താണ് ചിത്രം ഒരുക്കുന്നത്. രുധിരം, രൗദ്രം, രണം എന്നാണ് ആര്‍.ആര്‍.ആര്‍ എന്ന പേര് കൊണ്ട് ഉദ്ദേശിക്കുന്നത്.കൊവിഡ് പ്രതിസന്ധികള്‍ക്ക് ശേഷം ഒക്ടോബര്‍ ആദ്യവാരത്തോടെയാണ് ചിത്രത്തിന്റെ ഷൂട്ടിംഗ് പുനരാരംഭിച്ചത്.’
കൊമരു ഭീം, അല്ലൂരി സീതരാമ രാജു തുടങ്ങിയ സ്വാതന്ത്ര്യ സമര സേനാനികളുടെ സാങ്കല്‍പ്പിക കഥയാണ് ചിത്രം. തെന്നിന്ത്യയില്‍ നിന്നും ബോളിവുഡില്‍ നിന്നുമുള്ള വന്‍ താരനിരയാണ് ഈ ചിത്രത്തില്‍ അണിനിരക്കുന്നത്.
450 കോടി മുതല്‍മുടക്കില്‍ ഒരുങ്ങുന്ന ചിത്രത്തില്‍ ഒലിവിയ മോറിസ്, സമുദ്രക്കനി, അലിസണ്‍ ഡൂഡി, റേ സ്റ്റീവന്‍സണ്‍ എന്നിവരാണ് മറ്റ് പ്രധാനകഥാപാത്രങ്ങളെ അവതരിപ്പിക്കുന്നത്.
ഡി.വി.വി. ദാനയ്യയാണ് ചിത്രത്തിന്റെ നിര്‍മ്മാതാവ്. കെ. കെ. സെന്തില്‍കുമാര്‍ ഛായാഗ്രഹണം നിര്‍വഹിക്കുന്നു. സംഗീതം: എം.എം. കീരവാണി. പി.ആര്‍.ഒ ആതിര ദില്‍ജിത്.
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം. വീഡിയോ സ്‌റ്റോറികള്‍ക്കായി ഞങ്ങളുടെ യൂട്യൂബ് ചാനല്‍ സബ്‌സ്‌ക്രൈബ് ചെയ്യുക
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
Content Highlight: Movie RRR will release on October 13 2021, Ram Charan, Junior NTR, Alia Bhatt, Ajay Devgan acts, Rajamouli directs