സിനിമാപ്രേമികള്‍ ഏറെ പ്രതീക്ഷയോടെ കാത്തിരിക്കുന്ന ചിത്രമാണ് മോഹന്‍ലാല്‍- തരുണ്‍ മൂര്‍ത്തി ഒന്നിക്കുന്ന പ്രൊജക്ട്. എല്‍360 എന്ന് താത്കാലിക ടൈറ്റില്‍ ഇട്ട ചിത്രത്തിന്റെ യഥാര്‍ത്ഥ ടൈറ്റില്‍ എന്താകുമെന്നറിയാന്‍ ആരാധകര്‍ ആകാംക്ഷയോടെ കാത്തിരിക്കുകയായിരുന്നു. ടൈറ്റിലിനായി അണിയറപ്രവര്‍ത്തകര്‍ ഓണ്‍ലൈന്‍ മത്സരം വരെ സംഘടിപ്പിച്ചിരുന്നു. ഇപ്പോഴിതാ ചിത്രത്തിന്റെ ടൈറ്റില്‍ അണിയറപ്രവര്‍ത്തകര്‍ ഔദ്യോഗികമായി പ്രഖ്യാപിച്ചിരിക്കുകയാണ്.
തുടരും എന്നാണ് ചിത്രത്തിന് പേരിട്ടിരിക്കുന്നത്. സിമ്പിളായിട്ടുള്ള ടൈറ്റലിലെത്തിയ മോഹന്‍ലാലിന്റെ ദൃശ്യം, നേര് എന്നീ സിനിമകള്‍ പോലെ ബോക്‌സ് ഓഫീസില്‍ സര്‍പ്രൈസ് ഹിറ്റാകാന്‍ ഈ ചിത്രത്തിനും സാധിക്കുമെന്നാണ് ആരാധകര്‍ കരുതുന്നത്. ഒരു കൂട്ടം കുട്ടികളോടൊപ്പം കളിച്ച് ചിരിച്ച് നില്‍ക്കുന്ന മോഹന്‍ലാലാണ് പോസ്റ്ററിലുള്ളത്. ഫീല്‍ ഗുഡ് ഫാമിലി ചിത്രമാകും തുടരും എന്നാണ് പോസ്റ്റര്‍ നല്‍കുന്ന സൂചന.
ഓപ്പറേഷന്‍ ജാവ, സൗദി വെള്ളക്ക എന്നീ ചിത്രങ്ങള്‍ക്ക് ശേഷം തരുണ്‍ മൂര്‍ത്തി അണിയിച്ചൊരുക്കുന്ന ചിത്രമാണ് തുടരും. അനൗണ്‍സ്‌മെന്റ് മുതല്‍ക്കു തന്നെ ആരാധകര്‍ ചിത്രത്തിന് മേല്‍ വലിയ പ്രതീക്ഷകള്‍ വെച്ചിരുന്നു. പുലിമുരുകന്‍, ലൂസിഫര്‍ എന്നീ ചിത്രങ്ങളിലെ അമാനുഷിക കഥാപാത്രങ്ങളില്‍ നിന്ന് ഇടവേളയെടുത്ത് സാധാരണക്കാരായി മോഹന്‍ലാല്‍ അവതരിക്കുന്നത് കാണാന്‍ പ്രേക്ഷകര്‍ കാത്തിരിക്കുകയാണ്.
വര്‍ഷങ്ങള്‍ക്ക് ശേഷം മോഹന്‍ലാലും ശോഭനയും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. 2009ല്‍ റിലീസായ സാഗര്‍ ഏലിയാസ് ജാക്കിയിലാണ് ഇരുവരും അവസാനമായി ഒന്നിച്ചത്. ആര്‍ഷ ബൈജു, ബിനു പപ്പു, ഫര്‍ഹാന്‍ ഫാസില്‍ തുടങ്ങി മികച്ച താരനിര ഈ ചിത്രത്തില്‍ ഭാഗമാകുന്നുണ്ട്. നേരത്തെ മോഹന്‍ലാലിന്റെ പിറന്നാള്‍ ദിനത്തില്‍ ടൈറ്റില്‍ പുറത്തുവിടുമെന്ന് കരുതിയെങ്കിലും മാറ്റിവെക്കുകയായിരുന്നു.
രജപുത്ര വിഷ്വല്‍ മീഡിയയുടെ ബാനറില്‍ എം. രഞ്ജിത്താണ് തുടരും നിര്‍മിക്കുന്നത്. ജേക്‌സ് ബിജോയ്‌യാണ് ചിത്രത്തിന്റെ സംഗീതം. അന്തരിച്ച എഡിറ്റര്‍ നിഷാദ് യൂസഫാണ് ചിത്രത്തിന്റെ എഡിറ്റിങ് നിര്‍വഹിച്ചത്. ചിത്രത്തിന്റെ ഷൂട്ട് അടുത്തിടെ പൂര്‍ത്തിയായിരുന്നു. അടുത്ത വര്‍ഷം വിഷു റിലീസായ തുടരം പ്രേക്ഷകരിലേക്കെത്തുമെന്നാണ് കരുതുന്നത്.
Content Highlight: Mohanlal Tharun Moorthy movie titled as Thudarum
