സത്യൻ അന്തിക്കാട് മോഹൻലാൽ സിനിമകൾ എന്നും മലയാളികളുടെ പ്രിയപ്പെട്ടവയാണ്. മോഹൻലാലിനെ ഒരു സാധാരണക്കാരനായി സത്യൻ അന്തിക്കാട് അവതരിപ്പിച്ചപ്പോഴെല്ലാം മലയാളികൾ ഇരുകൈയും നീട്ടി സ്വീകരിച്ചിട്ടേയുള്ളൂ.
നാടോടിക്കാറ്റ്, ഗാന്ധി നഗർ സെക്കന്റ് സ്ട്രീറ്റ്, സന്മനസ്സുള്ളവർക്ക് സമാധാനം തുടങ്ങിയ ചിത്രങ്ങളെല്ലാം അതിന് ഉദാഹരണമാണ്.
കുറച്ചു നാളുകളായി ഇരുവരും ഒരു സിനിമയ്ക്കായി ഒന്നിച്ചിട്ട്. എന്നും എപ്പോഴുമാണ് രണ്ടുപേരും അവസാനമായി ഒന്നിച്ച ചിത്രം. എന്നാൽ തന്റെ അടുത്ത ചിത്രം മോഹൻലാലിനൊപ്പമായിരിക്കുമെന്ന് സത്യൻ അന്തിക്കാട് ഈയിടെ ഒരു സൂചന നൽകിയിരുന്നു. എന്നാൽ അതുറപ്പിക്കുന്ന വിധത്തിൽ ഒരു ഇൻസ്റ്റാഗ്രാം സ്റ്റോറി കഴിഞ്ഞ ദിവസം സത്യൻ അന്തിക്കാടിന്റെ മകനും സംവിധായകനുമായ അനൂപ് സത്യൻ പോസ്റ്റ്‌ ചെയ്തിരുന്നു.
സൂപ്പർ ഫൺ പ്ലോട്ടുമായി ഒരു മോഹൻലാൽ – സത്യൻ അന്തിക്കാട് ചിത്രം വരുന്നു എന്നായിരുന്നു സ്റ്റോറിയിൽ അനൂപ് സത്യൻ കുറിച്ചിരുന്നത്. എന്നാൽ ചിത്രത്തിന് ‘ഹൃദയ പൂർവ്വം’ എന്നാണ് പേരിട്ടിരിക്കുന്നതെന്നാണ് ഇപ്പോൾ പുറത്ത് വരുന്ന റിപ്പോർട്ടുകൾ.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രത്തിനായി നവാഗതനായ സോനു ടി.പിയാണ് തിരക്കഥ ഒരുക്കുന്നത്. അതിരൻ, സൂഫിയും സുജാതയും എന്നീ സിനിമകൾക്ക് ക്യാമറ ചെയ്ത അനു മൂത്തേടത് ചായഗ്രഹണം നിർവഹിക്കുന്ന ചിത്രത്തിന് ജസ്റ്റിൻ പ്രഭാകർ സംഗീതം ഒരുക്കുമെന്നാണ് റിപ്പോർട്ടുകൾ.
ആരാധകരടക്കം നിരവധിപേരാണ് ചിത്രം ഏറ്റെടുത്തിരിക്കുന്നത്. 2024ൽ പ്രതീക്ഷയുള്ള ഒരുപിടി മോഹൻലാൽ ചിത്രങ്ങളുണ്ട്.
എമ്പുരാൻ, തരുൺ മൂർത്തി – മോഹൻലാൽ ചിത്രം, ബറോസ്, റമ്പാൻ തുടങ്ങിയ സിനിമകൾക്കൊപ്പം വീണ്ടുമൊരു സത്യൻ അന്തിക്കാട് മാജിക് കിട്ടുമെന്ന പ്രതീക്ഷയിലാണ് ആരാധകർ.
Content Highlight: Mohanlal – Sathyan Anthikkad New Movie Titled Hirdhaya Poorvam