സിനിമാലോകം ഇന്ന് ഏറെ കാത്തിരിക്കുന്ന സിനിമകളില്‍ ഒന്നാണ് ബറോസ്. 44 വര്‍ഷത്തെ സിനിമാജീവിതത്തില്‍ മോഹന്‍ലാല്‍ ആദ്യമായി സംവിധായക കുപ്പായമണിയുന്നു എന്ന പ്രത്യേകത ഈ ചിത്രത്തിനുണ്ട്. അതിനാല്‍ തന്നെ ബറോസിന്റെ ഓരോ അപ്‌ഡേറ്റിനും വേണ്ടിയുള്ള കാത്തിരിപ്പിലാണ് സിനിമാ പ്രേമികള്‍.
2019ലായിരുന്നു മോഹന്‍ലാല്‍ ബറോസിന്റെ കാര്യം അനൗണ്‍സ് ചെയ്തത്. ചിത്രത്തില്‍ ടൈറ്റില്‍ കഥാപാത്രത്തെ അവതരിപ്പിച്ചിരിക്കുന്നതും മോഹന്‍ലാല്‍ തന്നെയാണ്. ഇപ്പോള്‍ ചിത്രത്തിന്റെ ഏറ്റവും പുതിയ അപ്‌ഡേറ്റുമായി എത്തിയിരിക്കുകയാണ് താരം. ബറോസിന്റെ റിലീസ് തീയതി പ്രഖ്യാപിച്ചിരിക്കുകയാണ് മോഹന്‍ലാല്‍.
ഒക്ടോബര്‍ മൂന്നിനാണ് ചിത്രം തിയേറ്ററുകളില്‍ എത്തുക. തന്റെ സോഷ്യല്‍ മീഡിയ പേജിലൂടെ മോഹന്‍ലാല്‍ ഈ കാര്യം പങ്കുവെച്ചത്. ‘തന്റെ രഹസ്യങ്ങള്‍ വെളിപ്പെടുത്താന്‍ ബറോസ് എത്തുന്നു, 2024 ഒക്ടോബര്‍ മൂന്നിന്. തീയതി കലണ്ടറുകളില്‍ അടയാളപ്പെടുത്തുക’ എന്ന അടിക്കുറിപ്പോടെയാണ് ഈ അപ്‌ഡേറ്റ് പുറത്തുവിട്ടത്.
ആദ്യം സെപ്തംബര്‍ 12നായിരുന്നു ബറോസ് റിലീസ് ചെയ്യാന്‍ തീരുമാനിച്ചത്. എന്നാല്‍ ചില സാങ്കേതിക കാരണങ്ങളാല്‍ മാറ്റുകയായിരുന്നു. 2021ല്‍ ഷൂട്ടിങ് ആരംഭിച്ച ചിത്രം കൊവിഡ് ലോക്ക്ഡൗണ്‍ കാരണം പൂര്‍ത്തിയാവാന്‍ സമയമെടുത്തിരുന്നു. പൂര്‍ണമായും ത്രീഡിയിലാണ് സിനിമ ചിത്രീകരിച്ചിരിക്കുന്നത്.
മലയാളത്തിലെ ആദ്യ ത്രീഡി ചിത്രം അണിയിച്ചൊരുക്കിയ ജിജോ പുന്നൂസാണ് ചിത്രത്തിന്റെ കഥ. ചിത്രത്തിലെ മോഹന്‍ലാലിന്റെ ഗെറ്റപ്പ് ആദ്യം മുതല്‍ക്കേ ചര്‍ച്ചയായിരുന്നു. ഫാന്റസി അഡ്വഞ്ചര്‍ ഴോണറിലാണ് ചിത്രം ഒരുങ്ങുന്നത്. കൊച്ചിയിലും ഗോവയിലുമായാണ് സിനിമ പൂര്‍ത്തിയാക്കിയത്.
വാസ്‌കോ ഡ ഗാമയുടെ നിധി സൂക്ഷിപ്പുകാരനായ ബാറോസ് എന്ന ഭൂതത്താനായാണ് മോഹന്‍ലാല്‍ ചിത്രത്തിലെത്തുന്നത്. ലിഡിയന്‍ നാദസ്വരവും മാര്‍ക്ക് കിലിയനുമാണ് ചിത്രത്തിന്റെ സംഗീതം. സന്തോഷ് ശിവന്‍ ഛായാഗ്രഹണം നിര്‍വഹിക്കുന്ന ചിത്രം നിര്‍മിച്ചിരിക്കുന്നത് ആന്റണി പെരുമ്പാവൂരാണ്.
Content Highlight: Mohanlal Movie Barroz Release Date Out
